آآآآه ياجده

بالبلدي الفصيح

ماني عارف ايش أقول.. أقول كل سنة وانتو بخير وصحة وسلامه، والا اقول أحسن الله عزانا وعزاكم في الأوادم البريئة اللي ماتت بسبب السيول، أسأل الله سبحانه وتعالى انه يرحمهم ويصبر أهاليهم ويكونوا من الشهداء ويكون مثواهم جنة الفردوس.
ودحين تعالوا ندخل في هرجتنا.. دحين انت لك كم يوم وانت طالع للبيت ونازل من البيت ولستك الكفر ده في يدك ليش وعشان ايش؟ أصلك انتي منتي عارفة ايش الحكاية.. يا الله من حقك الحكاوي اللي مو راضية تخلص وايش هيه الحكاية ياسيدي؟ الحكاية ياستي بتقول انه الباشمهندس عادل فقيه قال بعظمة لسانه انه المطره فاجأتهم وما حسبوا حسابها، شفتي كيف أبسط وأحلى إجابة نطق بيها الأمين على جده اللي هوه جالس ومتربع في الدور العشر طعشر من مبنى الأمانه وله خمس سنوات أمين على مدينة جده وما شفنا انه حصل شي بالنسبة لمشاريع تصريف مياه الأمطار ولا عن مشاريع الصرف الصحي، عشان كده أنا شايل معايا لستك الكفر ده لأنه يا روح ما بعدك روح ولو نزلت المطره تاني مره فجأه أكون مستعد. عشان كده أنصح كل الحبايب انهم ياخدوا احتياطاتهم ويكون مع كل واحد منهم لستك كفر عشان لو نزلت المطره فجأه يكونوا مستعدين لها.مليارات الريالات بتدفعها الدولة عشان المشاريع فين بتروح وفين المشاريع اللي بيقولوا عليها إذا كان نفق الملك عبد الله موية المطره غمرتو لعينو!، معقوله ياناس نفق كلف الدولة 172 مليون ما يكون فيه تصريف لموية المطره، مين هيه دي الشركة اللي نفذت المشروع؟ وخلا أرواح الناس تموت في دا النفق، هدا غير الأوادم اللي ماتت في الأحياء الشعبية في شرق جده وجنوبها.. مين اللي سمح انه تقوم بيوت وعماير على مجرى السيول وهما عارفين ومتأكدين انه هادي الأماكن ما يجي من وراها إلا الدمار والموت لساكنيها... فين راحت ال 95 مليون اللي اتبرع بيها خادم الحرمين الشريفين عشان نتخلص من عفن وقرف بحيرة الصرف الصحي.. لا والمصيبه الكبيرة انه مساحة جده كلها 900 كم مربع واللي متغطي بشبكة الصرف الصحي بس 73 كم مربع يعني جده القديمه بس، أما جده الجديده يفتح الله لا تصريف ولا يحزنون، 30 سنه وجده جالسه تئن وتشتكي والحال زي ما هوه مكانك سر لا يسر لا عدو ولا حبيب، 30 سنة ونحنا بنسمع ونقرا التصريحات والوعود واللي بيقولوا فيها ح نخلي جده مدينة عالمية، 30 سنة ونحنا بنسمع ونقرا عن مشاريع الصرف الصحي ومشاريع تصريف مياه الأمطار وما شفنا منها شي على أرض الواقع، 30 سنة والدولة حفظها الله ما قصرت بتصرف المليارات.. ليه يا أمناء جده كنتو تقولوا حتخلوا جده مدينة عالمية لكنكم للأسف شوهتوا جمالها، سرقتوا الكحل من عيونها، قصيتوا شعرها الطويل الأسود، وسختوا ثوبها الأبيض الجميل، شوارعها مبهدله آخر بهدله، الحفر والمطبات أشكال وأنواع في كل حي وفي كل شارع وزقاق بس مو فالحين الا يسفلتوا الشوارع الرئيسية لكن داخل الأحياء يفتح الله، عشان كده لازم نعطي الأمانه شهادة الايزو العالمية في مقولة «من بره الله الله ومن جوه يعلم الله» ونعطيها كمان شهادة التلييس بدرجة امتياز في مقولة «طبطب وليس يطلع كويس».
عشان كده وأقولها بالفم المليان لازم نحاسب كل الجهات المسؤولة عن كارثة الأمطار والسيول اللي حصلت لمدينة جده، واللي راحوا فيها ناس أبرياء وفقدوا فيها أهاليهم وبيوتهم وممتلكاتهم وسياراتهم، وأتمنى من كل قلبي انه هادي المصيبه اللي حصلت ما تمر مرور الكرام، ولازم من محاسبة كل المقصرين اللي أساؤوا لجده وأهل جده. وعيشووا كتيييييير تشوفوا كتييييييير.
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة