ده إللي ناقص

بالبلدي الفصيح

شي يفور الدم ويوجع القلب الخبر اللي كان منشور في جريدة المدينة يوم الأحد الماضي واللي بيقول «توظيف أول 30 سعودية عاملات منازل براتب 1500 ريال في الشهر» ايش أقول بس لا حول ولا قوة إلا بالله إلى هدا الحد وصلت الحكاية خلاص انتهت الأعمال وما لقيوا إلا عاملات منازل بالله من يرضاها على أخته أو بنته في هدا الزمن اللي كله مصايب، يعني خلاص انتهت الوظايف وما لقيت الأخت (هناء عثمان حسن) مسؤولة توظيف في إحدى المؤسسات الخاصة إلا هادي الوظايف عشان توظف فيها بنات وأخوات بلدي حتى لو كان ما عندهم الشهادة الابتدائية.. فين الجمعيات الخيرية فين الضمان الاجتماعي الحمد لله والشكر لله بلدنا فيها الخير والبركة والنعمة الكبيرة واقتصادنا الحمد لله قوي والمسؤولين ما قصروا لكن فين القائمين على التخطيط للقوى العاملة.. البلد ياكتر المصانع فيها اللي بنتج البسكويتات والحلويات والعصائر والألبان وظفوهم في هادي المصانع على قد شهاداتهم والحكاية كلها (افتح الكرتون وعبي في الكرتون) ما حيسووا صواريخ شوية تدريب وحيكونوا عال العال روحوا شوفوا المصانع اللي في الخارج وشوفوا مين اللي واقف على خطوط الإنتاج والتغليف.. وظفوهم في البنوك والشركات النسائية كمراسلات... فين بنك التسليف؟ اعطوهم قروض عشان يسووا لهم بسطات جنب الأسواق والمراكز التجارية وخلوهم يترزقووا والله حيكسبوا ذهب من بسطاتهم... وظفوهم في شركات بيع الملابس النسائية وخلوهم يبيعوا ويشتروا للحريم والبنات على الأقل يكون في خصوصية لهم بدل الإحراج اللي بيشوفوه من البائع.. عشان كده بقول يارجال الأعمال يا أصحاب المصانع والشركات بناتنا وحريمنا الغلابا أمانه دبروا لهم وظايف على قد مستوياهم وشهاداتهم وخلوهم يعيشوا بدل هادي الوظايف اللي ما حيجي منها إلا المصايب والهم والغم وعيشوا كتييييير تشوفوا كتييييير.
abofatoo@hotmail.com
فاكس: 6764070
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة