كنت لسه أبغى أحط راسي على الفراش .. إلا واسمع خربشة وكحكحة في الحنفية. معقولة ؟ معقولة تكون جات !.. لها شهرين مقطوعة..! إلا وقمت زي الحصان .. خفيف ..خفيف ..على الغرفة..!؟ أصحي الحرمة .. ياحرمة قومي المويه جات.. المويه جات يلا قومي. قومي ياشيخة دا نوم ولا موت....! وأخيرا صحيت بعد ما خرجت عيني .. إيش في يا أبو فتو ..؟ قومي قومي المويه جات.. المويه جات .. شكلك بتحلم ولا جرى لعقلك حاجه ..!؟؟ أقولك .. قومي ترى سمعت صوت خربشة وكحكحة في الحنفية حقت المويه ..!! قامت أم فتو زي المجنونة .. ماصدقت الهرجة وسحبتني من يدي ورحنا على الحنفية.. وفكينا البزابيز وجبنا الجوالين وجهزنا البراميل.. عشان نبغى المويه تصب .. خايفين تنقطع المويه ونقعد لها شهرين كمان ..!؟ وقعدنا نستنى الموية تصب .. ومرت ساعة وساعتين لاصبت المويه ولا يحزنون.. طالعت فيا أم فتو وفرصعت عيونها وقالت لي : عاجبك كده .!!! لاصبت المويه ولا يحزنون.. طيرت أعز نومة بالخبر الفشنك حقك هدا؟!!! سامحيني يا أم فتو افتكرت المويه جات.. شهرين ياستي والمويه ما صبت رغم إنه محطة الشعيبة فيها مويه ياكترها وما عمرنا سمعنا إنه المحطة خربانة بالعكس شغالة زي الحلاوة بس بعض الحبايب اللي ذمتهم واسعة ما يعجبهم راحة الأوادم .. أحياء كتيرة في الطائف المويه مقطوعة عنهم حي السحيلي وحي اليمانية والشهداء الشمالية والشهداء الجنوبية اللي بيقولوا عليها الصين الشعبية من كتر السكان اللي عايشين فيه والأهالي الله يكون في عونهم كل يوم والتاني وهما ماسكين طوابير بالأيام والساعات عشان يلاقوا وايت يعبوا منه خزاناتهم .. طيب ياسيدي وهادي الوايتات المليانة مويه واللي طول النهار والليل وهيه سردادي مردادي في شوارع الطائف ليه ما تصب في خزانات الناس بدل ماهي مبهدلة ومكسرة الشوارع والا الحكاية فيها (إن) ؟ هيه مو (إن) بس هادي فيها إن وأخواتها وخالاتها وعماتها كمان .. بس أنا مو قاهرني وفاقع مرارتي إلا تصريح وزير المياه لما قال بعظمة لسانه قبل شهر تقريبا (مستعدون للصيف لضمان عدم انقطاع المياه في جدةوالطائف).. قلت في نفسي (طيب) ولا من ده الكلام حصل أهالي الطائف متشحتفين شحتفة عشان قطرة مويه .. طيب يا سيدي ليه بعض الأحياء عندهم مويه وبعضهم لا ؟.. لأنه يا ستي أكيد اللي ساكنين في هادي الأحياء نجوم في الفن ونجوم في الكورة هدا غير نجوم الليل، عشان كده ما تنقطع المويه عندهم.. أتمنى من كل قلبي أن تنتهي معاناة أهل الطائف من حكاية انقطاع الموية عندهم لأنه الإجازه الصيفية باقي لها كم شهر وتجي والا حتكون مصيبة كبيرة إذا انقطعت المويه عن المصطافين اللي حيكونوا هناك عشان كده بتمنى من المسوؤلين حقون المويه إنهم يشوفوا حل عاجل لهادي المصيبة اللي بيعاني منها أهالي الطائف الغالين والعزيزين على قلوبنا.. وعيشوا كتييييير تشوفوا كتييييير.
