والنهاية معاكم يا دكاترة

بالبلدي الفصيح

قبل لا أدخل في هرجتي حق اليوم أحب أقدم شكري وتقديري لكل المتطوعين والمتطوعات كبيرهم وصغيرهم على المجهودات الكبيره اللي قاموا بيها بخصوص حبايبنا اللي تضروروا من حكاية السيول وأسأل الله سبحانه وتعالى انه يكون هدا العمل اللي قاموا بيه من مساعدات ومجهودات كبيره في ميزان حسناتهم لأنهم بصراحة كده طبقوا الحديث النبوي الشريف اللي بيقول «المؤمن للمؤمن كالبنيان المرصوص يشد بعضه بعضا» وجزاكم الله خير... ودحين يا حبايب تعالوا ندخل في هرجتنا حق اليوم... دحين انت لك كم يوم وضرسك مورم ومن كتر الورمان اللي فيه عيونك دخلت جوة وجهك روح شوفلك صرفة عند دكتور الأسنان... قلتي إيش يختي؟ أروح عند مين؟ دكتور الأسنان ليه قالولك أهبل والا أتجننت تبغيني أروح للدكتور حق الأسنان عشان يعطيني شرنقة تخدير وبعد كده انسدح جنبو ويسحبوني بعد كده على الشرشورة يعني ادخل برجولي وأخرج مكفن لا ياستي خليني كده لا أبغى أروح ولا أبغى أجي الله يخلي حبة القرنفل والبنادول قال دكتور أسنان قال.. دكاترة الأيام دي وخاصة دكاترة التخدير صاروا يخوفوا من كتر المصايب والأخطاء الطبية اللي بيسببوها للأوادم رجال وحريم وأولاد وبنات وكمان مواليد يدخلوا هادي المستشفيات اللي سمعتها من بره الله الله ومن جوه يعلم الله بكامل صحتهم ويخرجوا منها بتوابيت من جد صار الواحد يخاف على نفسه من ده اللي جالس بيصير في المستشفيات والمصيبة أنها مستشفيات كبيرة ولها سمعتها في البلد والمصيبة الكبيرة انه المستشفيات في المملكة سجلت في سنتين بس 26 ألف خطأ طبي وفي النهاية يجيك قرار لا يسمن ولا يغني من جوع يقولك (غرموا المستشفى وطبيب التخدير يا عيني) ايش حيستفيد أهل اللي مات من التغريم طالما مريضهم راح فطيس باستهتار طبيب التخدير والله ما تغنيهم أموال الدنيا عن فقدان آيائهم أو أمهاتهم أو أولادهم أو بناتهم أو حتى مواليدهم اللي بيموتوا عليهم بسبب استهتار طبيب وزيادة جرعة مخدر... يادكاترة التخدير خافوا الله في الناس أرواح الناس مو لعبة وحرام عليكم هدا الاستهتار اللي بتسووه في أحاسيس ومشاعر الناس عيب كده عيب هدا اللي جالسيبن بتسووه في عباد الله اتعاملوا مع المرضى على أنهم أوادم لا تعاملوهم كأنهم بهايم في (مجزرة) إلى هادي الدرجة وصلت قيمة الإنسان في سوق الطب التجاري خلاص ما عاد في رادع ولا خوف من الله إلى هادي الدرجة صار الإنسان رخيص.. أتمنى من كل قلبي انه وزارة الصحة تصدر قرارات قوية وصارمة بحق هادول الدكاترة اللي بغلطوا زي هادي الغلطات اللي ما يجي من وراها إلا فتح القبور وتعب القلوب أما مسألة التغريم اللي بتقول عليها فعمر الفلوس ما ترجع اللي راح ولا تبرد قلوب الناس اللي فقدوا كل عزيز لهم عشان كده بقول يا دكاترة التخدير اتقوا الله وخافوا الله في الناس وافتكروا أنكم أطباء مو جزارين وعيشوا كتيييير تشوفوا كتيييير.
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة