قال تأمين طبي قال

بالبلدي الفصيح

دحين لك كم يوم محد عارف هادا الورم اللي في وجهك هوه من ألم في عيونك والا ألم في اسنانك صار وجهك مبرشم برشمه.. ايوه خودي راحتك ياستي في الكلام أصلا انتي ما تسيبيكي من النكد والخزاوه.. طيب ياسيدي ليه ما تروح للصحية عشان يشوفولك صرفه في الورم ده؟.. لا ياستي لا أبغى أروح ولا أبغى أجي خليني كده أحسن، لا يروح واحد من الدكاتره حقون التخدير يعطيني شرنقه (إبره) ويخليني انسدح جنبو طول عمري، خليني كده على الورم اللي عندي والله يخلي الفكس والقرنفل.. طيب وبطاقة التأمين اللي معاك ياسيدي حاططها في جيبك زينه؟.. ياستي بطاقة التأمين الطبي زي قلتها، أعطونا هيه عشان يوجعوا قلوبنا ويفوروا دمنا، ما منها فايده كل ما تروح مستشفى من المستشفيات يخرجوا عينك ويبهدلوك آخر بهدله عشان يعالجوك، أول شي ياخدو منك 30 ريال عن كل كشف ليه ما تدري؟ وما يعطوك العلاج اللي تبغاه إلا بعد ما تجي الموافقه من شركة التأمين على العلاج، كأنك قاعد بتشحت منهم، رغم انه الشركات والمؤسسات اللي متعاقده معاهم بتدفع لهم الملاييين، يعني الواحد يروح على الشرشوره والموافقه لسه ماجات، كأنه الموافقه على العلاج حتجي من الأمم المتحده اللي لا تهش ولا تنش، وجودها زي عدمها، كل ما تروح مستشفى معتمد بالتأمين الطبي تلاقي تعليمات تفقع القلب، حتى سحب العصب يبغالو موافقه كأنك رايح تسحب شاصيه، كل حاجه عندهم لازم موافقه؛ علاج الأسنان موافقه، علاج الإسهال، وعلاج العيون، وأي مرض تشتكي منه يبغالو موافقه على العلاج، هدا غير انه أمراض النساء والولاده لازم تكع فلوس على الأشعة والأدويه، تقولهم ليه كده؟ يردوا عليك بفم مليان وعيون قويه: هادي الحاجات ما يغطيها التأمين، يعني بالعربي لا تجيب بزوره على حسابنا، هيا بالله ايش من تأمين طبي؟ هدا اسمه ضحك على الدقون، ملاييين الريالات بيلطوشوها من الشركات والمؤسسات على عقود التأمين الطبي اللي بيقولوا عليه، وكل اللي بيصرفوه من الأدويه كم قارورة دواء كحه وكم بكت حبوب مهدئه، لكن ما أقول الا الله يعين الحبايب على شركات التأمين الطبي اللي قاعده تضحك على عباد الله، وأسأل الله انه لا يحوجنا لهم.. وعيشوا كتييييير تشوفوا كتيييير.
abofatoo@hotmail.com
فاكس: 6764070
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة