من يوم ما نشرت مشكلة طلاب وطالبات الانتساب وتلفون مكتبي ولا هجد ما في إلا شكاوى في شكاوى وكل واحد يتصل أو وحدة تتصل وأنا أقولهم حاضر طيب حنكتب في المشكلة اللي عندكم وربنا يسهل هدا غير الرسايل اللي جتني على الإيميل واللي اخترت منها هادي المشكلتين عشان كده بتمنى من تعليمنا العالي إنه يشوف حل لهادي المشاكل ويحاول قد ما يقدر إنه يحلها وتعالوا دحين ياحبايب نشوف إيش بتقول هادي المشكلتين: الأولى بتقول: «نحن طالبات جامعة الملك عبد العزيز نناشد الدكتور خالد العنقري أن يقف معنا وينظر لحالنا تقدمنا بطلب التحويل الداخلي بين كليات جامعة الملك عبد العزيز، من كلياتنا المختلفة إلى كلية الاقتصاد والإدارة وكان المعدل المطلوب للتحويل لكلية الاقتصاد 3.75، وعند ظهور نتائج التحويل الداخلي ظهرت نتائج التحويل للكليات المختلفة ما عدا كلية الاقتصاد والإدارة وعند مراجعتنا للكلية أخبرونا بأنه لا توجد أماكن شاغرة في الكلية ثم بعد ذلك قالوا لنا إن المعدل المطلوب لقبول التحويل لها هو 5 وهذا هو المعدل الكامل التي تمنحه جامعة الملك عبد العزيز للطلبة ومن المجحف اعتماده لقبول الطلب وبهذا لم تقبل أي طالبة رغم معدلاتهن العالية مما أشعرهن بخذلان الجامعة لهن وعدم الشعور بالمسؤولية من قبل الكلية بمطالبتها بمعدل يعجز الطالب عن تحقيقه في ظل الظلم الذي نشهده من قبل الدكاترة لذا نطالب المسؤولين في التعليم العالي بتوجيه المسؤولين في جامعة الملك عبدالعزيز أن يتم تحويلنا فورا لكلية الاقتصاد والإدارة.». * والمشكلة التانية بتقول من فين راح أبدا وإلا إيش أقول مشكلة كلية العلوم دي من زماااان مو من دحيين يعني مو شي جديد تصدق إنو (مامتي) درست في الجامعة في نفس القسم اللي أنا بدرس فية دحين (كيمياء حيوية) قبل 12 سنة من وقتها والقسم هادا مالو أي تعريف في مجال العمل يعني أمي و أغلب زميلاتها من نفس الدفعة اتعلقت شهادتهم ع باب التلاجه..!! معروف إنو جميع المتخرجين من كلية العلوم يا بيلجأوا للتدريس أو إنهم بيشتغلو في مهنة بعيدة جدا عن الشي اللي درسوه. قلة قليلة جدا هما اللي بيلاقو وظائف بنفس التخصص وبعد ما يدوخوا السبع دوخات .. حرام إنو أنا أدرس في تخصص جدا جميل وممتع بس ما أنجز فيه لأنو ما في أي دافع بيخليني أتحمس في تكملة الدراسه في نفس القسم.. عشان في النهايه أنا كمان راح أعلق الشهادة على باب التلاجة زي اللي قبلي إحنا ما ننكر إنو الكلية لها كتير مزايا جيدة أولا نفس التخصصات جدا رائعة كمادة يعني (احفظ وفرغ على على ورقة الامتحان..).. غير كدا إنه كلية العلوم صارت تقبل كل من هب ودب إنه يدخلوا كلية العلوم حتى لو كانت معدلاتهم منخفضة بس الأمل دا بسرعة راح ينتهي لمن نتخرج وما نلاقي وظيفة وحجتهم قال إيش ما لكم مسمى وظيفي في سلم الوظايف ياسبحان الله في كل دول العالم المتقدمة بيعتبروا خريج كلية العلوم عالم أو عبقري إلا هنا ما له قيمة؟ طيب على كده قفلوا كلية العلوم وريحونا من وجع الدماغ إذا ما في مخرجات لكلية العلوم ويقولولك كمان إنو طلاب الكلية العلمية التطبيقية لهم الأولوية في التوظيف!! ونحنا نروح نبلط البحر ولاحظ معايا إنو كلية العلوم التطبيقية وناخد منها مثال قسم المختبرات هادول اللي في قسم المختبرات بيدرسوا نفس المواد اللي قسم الكيمياء الحيوية بيدرسها في كلية العلوم يعني طلاب القسمين بيدرسوا أربع سنين نفس المواد اللهم إنو قسم المختبرات عندهم سنة زيادة إجبارية ياخدوا فيها تطبيق في أي جهة عمل يرغبوا فيها وإحنا طلاب الكيمياء الحيوي العمل الميداني مو إجباري هما سنة كاملة وإحنا شهر شهرين إذا كتر يعني هادا الفرق البسيط جدا خلى المئات والمئات من الطلاب في كم دفعة متخرجة مايلاقوا أي وظيفة يشتغلوا فيها ويقولوا كمان إنو إذا تبغوا وظيفة في أي مستشفى لازم تكون من حملة شهادة الماجستير.. يعني بالبلدي كده إنو شهادتنا بعد الماجستير راح تكون أقوى من شهادة طلاب البكالوريوس (مختبرات) حلوة هادي أقولك شي يرفع الضغط ويجيب السكر ويفقع المرارة .. وبعدين مو الكل يقدر يكمل دراسة إلين يوصل لدرجة الماجستير. وغير كده فين العدل إنو أنا اللي حاصلة على درجة الماجستير يساووني مع وحدة تانية حاملة للبكالوريوس في الوظيفة؟؟!! بالعقل أنا لازم وظيفتي ومرتبتي تختلف عنها وبكثير كمان. إيش أقول وإيش أعيد نحنا ما نبغى إلا شي واحد الله يستر عليكم اعترفوا بشهادتنا بلاش من التحطيم هادا .. أنا أدرس واشقى واتعب وفي النهايه أنطق في البيت زيي زي اللي مادرست .. من دحين قولوا لنا إذا مش راح نلاقي وظائف نروح نسحب ملفاتنا ونجلس في بيوتنا وبلاش من الهم والغم ووجع القلب اللي نحنا عايشين فيه.. إيش رأيكم يا تعليمنا العالي وعيشوا كتيييييير تشوفوا كتيييييير. مثل حجازي: رضينا بالهم والهم ما رضي بينا. [email protected] للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة
