null

دحين انت من ساعة ما بطلت تقرأ في الجريدة الا وانت متنكد ومهموم ومتضايق؟ وكيف ما تبغيني ازعل واضايق وبعض تصاريح المسؤولين تجيب السكر وترفع الضغط ليه ياسيدي هوه ايش اللي حصل ؟ شوفي الخبر ده يوجع القلب والا لا ((أقر وزير الصحة الدكتور عبدالله الربيعة، بوجود نقص في الوظائف الإدارية والفنية على مستوى الوزارة.)) من جد شي يوجع القلب اكتر من اربعمية معهد صحي واكاديمية صحية بيتخرجوا منها الالاف من الطلاب والطالبات بعد ما يكونوا دفعوا دم قلبهم ودرسوا وتعبوا طيب ليه كده يا وزير الصحة وانت عارف ومتأكد انه البلد مليانة متخرجين ومتخرجات بالالاف ليش ما نعينهم في المستشفيات بدل ما هما جالسين على رصيف البطالة وانت عارف انه كل سنة بيتخرجوا الالاف من الطلاب والطالبات وفي كل التخصصات اللي تحتاجها المستشفيات الحكومية والا حلال على ابو كرفته وحرام على ولد البلد .. ليش نستقدم عمالة اجنبية وشباب وشابات البلد فيهم الخير والبركه ؟ ليش دايما خيرنا لغيرنا ؟ كل سنة من الكليات الصحية متخرجين ومتخرجات ومن كليات الطب متخرجين ومتخرجات وفي كل التخصصات ومن المعاهد الصحية اللي منتشرة في البلد برضوا في متخرجين ومتخرجات وفي كل التخصصات اللي تحتاجها المستشفيات حصتى المتخرجين والمتخرجات من كلية العلوم تخصص احياء دقيقة او فيزياء واللي المفروض يشتغلوا في مختبرات المستشفيات او في قسم الاشعه عاطلين عن العمل بحجة انه مالهم مسمى وظيفي عند طيبة الذكر وزارة الخدمة المدنية .. كتتتيير من الخريجين الفنيين ممرضين وممرضات حملة الاكاديمية للعلوم الصحية عاطلين من سنوات واكترهم ينتظروا اوامر وزارة الصحة مو حرام كده خساره مال ووقت هدا غير انه الهيئه التخصصيه معترفه بشهاداتهم ونهايتها بدون عمل. طب ليش توافقو على فتح الاكاديميات والمعاهد الصحية وتقبلوا طلبتها في التطبيق وتأخذوا المبالغ منهم وفي الاخير متخرجين ومتخرجات عاطلين .. متخرجين ومتخرجات من اقسام السجلات الطبية ومن سنوات وعاطلين فينها وزارة الصحة عنهم .. و ممرضين وممرضات متخرجين من سنوات فينها وزارة الصحة عنهم .. فنيو الاشعة اللي متخرجين من الاكاديميات الصحية ومن المعاهد الصحية ومن سنوات طويلة فينها وزارة الصحة عنهم ليش ما وظفتهم .. متخرجين ومتخرجات ومن كل التخصصات بيراجعوا وزارة الصحة من سنوات طويلة وكل ما يراجعوا يجيهم الرد سريع مافي وظايف راجعوا الخدمة المدنية يروحوا للخدمة المدنية يجيهم الرد نحنا مالنا شغل روحوا لوزارة الصحة وعلى كده زعيط يرمي على معيط ومعيط يرمي على نطاط الحيط وضاع عمر شبابنا وضاعت احلامهم ودراستهم وفلوسهم وهما على ده الموال الين ضاع شبابهم وضاعت حقوقهم وجاتهم الامراض النفسية والعصبية والاكتئاب وبعد الاكتئاب حيكون الانتحار جاهز عشان كده بقول يا وزارة الصحة دبريها وارحمي هادول المتخرجين والمتخرجات عشان ربنا يرحمكم في الدنيا قبل الاخرة والا ترى دعوة المظلوم مستجابة وانتو عاد ادرى وابخص وعيشوا كتيييييير تشوفوا كتيييييير
مثل حجازي:
كل حبة مسوسة لها كيال أعور
abofatoo@hotmail.com
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة