براد الشاهي برد يا سيدي وأنت جالس تفغص في ازارير الجوال وعيونك مفرصعة في الجريدة، أيش الحكاية؟ ابلعي ريقك وطولي بالك جالس بأكتب في الرموز أللي موجودة في الإعلان أللي نشروه الحبايب حقون صندوق التنمية العقاري كتر الله خيرهم، ريحونا وريحوا غيرنا من الهجولة والروحة والجية بالخدمة الإلكترونية أللي سووها، ودحين سيبيكي من الرغي حقك ونقليني أيش بتقول الرموز أللي موجودة في الإعلان، حاضر يا سيدي أكتب عندك 1*2*وبعدين حط رقم السجل المدني وتاريخ الميلاد زي ما هو مطلوب في الإعلان لأنه كل منطقة في المملكه ولها رمز، أهو كتبنا أللي قلتي عليه، هات الجوال وريني أشوف أيش كتبت لحسن أنت كبرت في السن ونظرك صار على حركرك، برضنا ما تسيبيكي من الخزاوة حقتك إلا تخبصيها في الأخير، طيب يا سيدي حاضر ولا تزعل نفسك خلاص كده الرسالة جاهزة ودحين أرسلها على الرقم 501111، أهو وهادي ضغطت زر للرسالة وما في ثواني إلا وجات رسالة من الصندوق العقاري بتقول ((تم استلام طلبك وسيتم الرد عليك برسالة نصية لاحقا. الصندوق العقاري)) طيب ياسيدي متى ح يردوا علينا ومتى ح يجينا السرا؟ يعني تقريبا لما نمشي أنا وانتي بالعكاكيز وألا لما أنا وانتي نكون ادحدرنا على مقبرة أمنا حوا والبركة في الورثة يمسكوا السرا بدالنا يعني ياستي بالبلدي كده يبغالنا تقريبا تلاتين سنة أقل شي لأنه المتقدمين وصل عددهم بالملايين خلال أسبوعين هدا غير الستمية ألف المنتظرين واللي لهم اكتر من خمس طعشر سنة ولسه ما جاهم القرض يعني على ما يقولوا الحبايب غني (ياليل ما أطولك) وعشان الستمية ألف ياخدو نصيبهم من القرض لازم يكون عند صندوق التنمية العقاري 143 مليار ريال والصندوق العقاري أول ما فتح التقديم عن طريق النت ورسايل الجوال وصل عدد المتقدمين أكتر من 3 مليون وهدا العدد حينضاف للستمية ألف المنتظرين من 15 سنة يعني الصندوق محتاج إلى أكثر من تلاتة تريليون ريال عشان كل مواطن ياخد نصيبة من القرض عشان كده بقول لمسؤولي صندوق التنمية العقاري نحنا ما نبغى نقعد طول عمرنا نطقطق على النت أو نرسل في رسايل الجوال عشان نقدم على القرض نحنا نبغى قول وفعل يعني بعد كم شهر تكون القروض موجوده في حسابات المواطنين عشان يقدروا يبنوا أراضيهم أو انهم يشتروا وحدات سكنية على قد قيمة القرض ويفتكوا من قرف وجشع وطمع ملاك العقارات أللي ما في قلوبهم رحمة على عباد الله وعشان خطة الإسكان تنجح ياريت يكون في تعاون من جهات تانية زي وزارة المالية ووزارة الشؤون البلدية والقروية وتعاون إمارات المناطق لتحديد مواقع ومخططات وأراضي عشان يقدروا يبنوا المساكن للغلابا أللي هلكتهم الأجارات وعكننت عليهم حياتهم والأراضي الحمد لله موجودة وعلى قد مد البصر بس أهم شي تكون النية صادقة وصافية وكله بإذن الله حيكون مية مية وعيشوا كتيييييير تشوفوا كتيييييير مثل حجازي/ بيت قد المراية ولا كل شهر كراية [email protected] للتواصل أرسل رسالة نصية sms إلى 88548 الاتصالات أو 636250 موبايلي أو 737701 زين تبدأ بالرمز 150 مسافة ثم الرسالة
