اكفش فار

بالبلدي الفصيح

الحقي يا امي، الحقي يا امي، شوفي ابويا ايش قاعد يسوي في الزقاق، معاه كرتون وجالس يصيد في العراري والبساس، هدا الراجل اتجنن رسمي ابعدي عن طريقي خليني اشوف ابوكي ده. ياسيدي انت ايش قاعد تسوي في الزقاق سيبك من العراري والبساس واطلع البيت، ماني طالع الا لما اصيد كم عري واحطوا جوة الكرتون، انتي تبغي المكافاة حقت امانة جدة تروح عليا، أي مكافاة يا سيدي انت ايش قاعد تقول. انا افهمك الهرجه ياستي .. أمانة جدة سوت حملة عشان مكافحة الفيران في المنطقة التاريخية وحطت مكافاة مالية للصيادين اللي ح يصيدوا الفيران والمكافاة على حسب العدد وحجم الفار وانت وحظك يا مليح، وزي منتي عارفة المنطقة التاريخية مليانة فيران اشكال والوان، عشان كده أنا جالس أصيد في البساس والعراري عشان يساعدوني في صيد الفيران، وشوفي عاد كيف حتصير حرب بين الصيادين من كتر ما حيصيدوا فيران المنطقة التاريخية، طيب يا سيدي ما قالولك الفارعلى كم؟ وسعر الحي بكم وسعر الميت بكم؟ لا ما قالوا لكن لما حنصيد الفيران الامانة ما حتقصر معانا، هيا مع السلامة أنا رايح اصيد الفيران.
وأول ما وصلنا للمنطقة التاريخية ونزلوا البساس والعراري من الكرتون عشان يصيدوا الفيران الا واشوفهم راجعين زي الصواريخ ودخلوا مرة تانية جوة الكرتون وقالوا بصوت واحد العمر مو لعبة هادي مو فيران هادي كناغر عاضتها كلاب وصارت مسعورة الواحد قد ايش كبره وانت جايبنا هنا عشان نصيدهم ترى نحنا معانا اظافير مو مسدس ساكتون.
من جد هم يبكي وهم يضحك يعني امانة جدة ما قدرت تحارب الفيران دي وطلبت من اهل المنطقة هما اللي يحاربوها.. شي عجيب من جد، في كل دول العالم في طرق واساليب يصيدوا فيها هادي الفيران شوفوا يا مسؤولي الامانه الطريقة الصحيحة عشان تقدروا تقضوا على هادي الفيران وبعدين هية الفيران موجوده في المنطقة التاريخية بس، الفيران موجوده في كل حي وفي كل شارع وفي كل زقاق من جدة وما ينفع معاها الاساليب البدائية اللي بتقول عليها الامانة عشان كده لازم يكون في دراسة ويكون في تنظيم عشان نقدر نقضي على هادي الفيران اللي موجوده في البلد بالملايين وفي كل حي من أحياء جده سواء الجديدة أو القديمة واسألوا اصحاب الفلل والعماير وشوفوا ردهم وانتو عارفين الامراض اللي بتجي من تحت راس الفيران وبعدين يكون في علمك يا امانة جدة طالما ما في صرف صحي في البلد احلمي انه الفيران تختفي من جده وحواريها، وبعدين لا سمح الله انه اهل المنطقة التاريخية هما اللي كافحوا هادي الفيران وجاتهم الامراض بسببها مين حيتبرع ويعالجهم يا امانة جدة انتي ما اعتقد وعيشوا كتييييير تشوفوا كتيييييير
مثل حجازي «حلم البساس أكلت فيران»
abofatoo@hotmail.com
للتواصل أرسل رسالة نصية sms إلى 88548 الاتصالات أو 636250 موبايلي أو 737701 زين تبدأ بالرمز 150 مسافة ثم الرسالة