اليوم يا سيدي حيكون اليوم العاشر على زاوية (سؤال لا يهدأ) في هادي الصحيفة والحبايب في وزارة التجارة سكتم بكتم لا أرى لا أسمع لا أتكلم وشكلهم كده ولا حيردوا وأكيد عاجبهم الحال ده زي المغني اللي بيغني قدام أصنج.. ياستي حيردوا يقولوا ايه وهما نايمين في العسل وأساسا لو يبغوا يردوا ويهرجوا كانوا من زمان اتلحلحوا وشافوا حل للغلا والتلاعب اللي بيصير في الأسعار لكن اللي يدو في الموية مو زي اللي يدو في النار والأسعار إدا ارتفعت يفتح الله إنها ترجع زي ما كانت وبعدين وزير التجارة مو فاضي ينزل للسوق عشان يشتري مقاضي بيته ويشوف بعينه ويسمع بأذنه ايش اللي قاعد بيصير في الأسواق من تلاعب وغش في الأسعار لأنه الخدم والحشم يا كترهم عنده وهما اللي قايمين بالحكاية دي وبعدين ما تفرق معاه ولا حاطط في باله انه في ناس غلابا عايشين معاه في الكون ده.. فين يروحوا أصحاب الدخل المحدود اللي رواتبهم يللا تكفيهم عشان يعيشوا حياة كريمة كيف حيعيشوا والغلا ده كاسر ظهرهم ومنفض جيوبهم. إيجار ومصاريف بيت ومدارس وكهرباء وتلفون هدا غير الاتصالات (تشتري بطاقة الشحن ويا ويلك لو ما خلصت رصيدها في يومها حيسحبوا منك فلوسها ورصيدها.. ايش لكم صلاح أخلصها في يومها والا في عشرة أيام مو أنا دافع قيمتها والا الحكاية بس لهط في لهط) بس تعرفوا ياحبايب ايش فايدة وزارة التجارة أنا أقولكم فايدتها ياحبايب انها واقفه مع التجار ضد المواطن الغلبان اللي غصبن عنه حيشتري الشي اللي يبغاه وبيردد بينه وبين نفسه حسبي الله ونعم الوكيل حتى هادي اللي اسمها حماية المستهلك على فكره يا حبايب أبغاكم تغيروا اسمها وتخلوها حماية التاجر لأنه بسلامتها شايفة ايش قاعد بيصير في السوق ومطنشة ولا كأنه يعنيها وكل يوم تشوف تصريحاتهم في الجرايد نحنا مسيطرين على السوق والوضع على ما يرام (ياعييني) بعدين أنا أبغى أفهم ليش ما يكون عندنا جمعيات تعاونية استهلاكية عشان نخفف شوية على المستهلك بدل هادي الأسعار اللي قصمت ظهورهم ونكدت عليهم حياتهم وبعدين فين الفرق الرقابية والتفتيشية اللي كل يوم والتاني وزارة التجارة وحماية المستهلك بتتغنى بيهم.. يا وزارة التجارة ويا حماية المستهلك المواطن الغلبان البسيط اللي عايش على قدو ومادد رجولو على قد لحافه طفش وزهق من كلامكم ومن تصريحاتكم اللي ما لها طعم ولا معنى كل شي في الأسواق ارتفع سعره وانتو الاتنين شايفين ايش اللي بيصير في السوق وساكتين يا ريتكم تتلحلحوا شوية وتتحركوا وتشوفوا حل لهادي المصايب اللي جالسه بتصير في الأسواق لانه خلاص المواطن البسيط بيقول بينه وبين نفسه (يا يدي فكي حلقي) وكفاية اللي فيه وارحموا من في الأرض يرحمكم من في السماء... وعيشوا كتييييييير تشوفوا كتييييييير. [email protected] فاكس : 6764070 للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة
