عليكم بقصب السكر

بالبلدي الفصيح

ايش هادي العصيان اللي جايبها معاك شكلو عندك جوش مزمار في الحارة اليوم؟ حارة ومزمار مرة وحدة يا أم فتو!!؟ هوه عاد باقي حارة ومزمار هدا الكلام كان زمان أيام ما كانوا أهالي الحارة المعتقين موجودين كان ما يمر يوم الا وتشوف الحارة تترج رج من المزمار دحين خلاص كل أهالي الحارة هجووا من بيوتهم ومن الحارة ومعد في شباب زي اول يلعبووا مزمار دحين صار عند بعض الشباب حاجة يقولوا عليها راب تلاقي الواحد منهم يرقص تحسب عنده صرع والا راكبوو جني وبعدين نصيحتي لكي إنك ترووحي لدكتور العيون لأنه دي مو عصيان مزمار هادي عصيان قصب سكر وعلى قول المتل عيون كبار للهواء والغبار... طيب ياسيدي خلاص فهمنا وليه جايبهم طيب؟ وعشان ايه؟ .. جايبهم ياستي لأنه السكر في البلد صار سعره غالي لأنه الكيس أبو 50 كيلو واللي كان سعره بس 105 ريال صار سعره 130 ريال والكيس أبو 5 كيلو كان ب 13 ريال صار ب 19 ريال والكيس أبو 10 كيلو كان ب 23 ريال صار ب 30 ريال والكلام ده أنا ما جبتووا من راسي هدا كلام الجرايد لأنه أنا الحمد لله ما أحب أفتري على أحد وشوفي عاد بعد كده كيف حتترفع كل أسعار وأنواع الحلويات وعذرهم حيكون إنه سعر السكر غالي ويابختهم حيسلخونا من كل شق وطرف وعشان كده بدل ما تسوي تلقيمة الشاهي بالسكر حووطي بداله قطعة صغيرة من عود قصب السكر واعتبريه كأنه سكر قوالب على الأقل هدا السكر طبيعي وبالمرة ما حيرتفع السكر لا عندي ولا عندك لأنه عود قصب السكر حلااااه طبيعي لكن اللي يرفع السكر ويجيب الضغط سكوت وزارة التجارة وحماية المستهلك على اللي قاعد بيصير في أسواق المواد الغذائية من يوم ما ارتفعت الأسعار ونحنا ننتظر من وزارة التجارة ومن جارتها اللي هيه حماية المستهلك انها تتحرك وتشوف حل لهادي المصايب اللي جالسة بتصير كل يوم والتاني لكن اللي حاصل انه ما عندك أحد وتجار المواد الغذائية شايفين شغلهم صح وعلى قول حبيبنا غوار الطوشه (كل مين إيدوو إلوووو) ولمن تجي تسأل التجار ليه رفعتووا أسعار السكر يردوا عليك رد بايخ ويقولوا الزياده جية من البرازيل والهند وإزا أردنا أن نعرف مازا حصل في السكر لا بد أن نعرف مازا حصل في البرازيل على قول صاحبنا حسني البرزان لكن اللي أنا عارفوو ومتأكد منه انه مستودعات أصحاب المواد الغذائية متروووسة بأكياس السكر لأنه بعض التجار خلاص الدنيا دخلت في قلبوو وما صار يهمهم إلا الفلوس لأنه المثل بيقوول من أمن العقوبة أساء الأدب لكن لو كان في متابعه وتفتيش وغرامات على أسواقنا ما حيكون ده حالنا حنقعد نغني أنا وانتي والحبايب ياليل ما أطولك... وعيشوا كتييييير تشوفوا كتييييير.
abofatoo@hotmail.com
فاكس: 6764070
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة