شارع الصحيفة

بالبلدي الفصيح

دحين انت ياسيدي عجبتك الزحمة دي؟ لنا ساعه زمان ونحنا متسمرين في السياره وكله من تحت راس شارع الصحيفة ده؟ آآه لا تفكريني بشارع الصحيفة او شارع غزة، هدا الشارع من أقدم شوارع جدة ومن الشوارع المنسية زي حال كل الشوارع القديمة في جدة، شارع ما له حظ مبهدل آخر بهدله وشارع الصحيفه ده كانت ساكنه فيه عوايل جداوية معروفه زي بيت احمد كنداسه الله يرحمه والعم عوض باني وحمدان خلاف وطه ابو طابونه ومنصور علوي وسعد طنطاوي وعابد عبدالجواد وزارع بدوي وزكي معوض ومحمد حمزه معوض وعبدالقادر رجب وعبدالعزيز رجب والغرباوي وفي هدا المركاز كان أقدم عمدة في جدة العم مبارك النبيهي الله يمسيه بالخير وبعد كده جاء العمدة صالح أبو الشامات الله يرحمه ودحين صار العمدة منصور عقيل الله يكون في عونه ويساعده، وبعدين لازم تعرفي انه هادي الزحمة اللي شايفاها جية من الأعداد المهوولة من الجاليات الهندية والباكستانية والبنقلاديشية واللي معطله الشارع بزحمتها هدا غيرالجاليات التانية واللي منتشرة في ده الشارع واليوم زي منتي عارفة جمعه وكلهم بيتلموا هنا في هدا الشارع وكأنك ماشي في شارع من شوارع بومباي او بنقلاديش لانه كل الدكاكين والمطاعم اللي شايفاها شغالين فيها كل هادي الجنسيات عشان كده بيتلموا ويسووا زحام في هدا الشارع، لكن ان شاء الله طالما جاء نظام النطاقات حق مكتب العمل واللي حيطبق على المؤسسات والشركات حتشوفي كيف حيتنظف الشارع من هادول العالم لأنه اغلب هادول الناس اشتروا الفيز من ناس ما تخاف الله وجابوهم على البلد وشعتروهم في كل شارع وزقاق وهما ما عندهم لا شغله ولا مهره، طيب ياسيدي فكنا من الزحمة دي وادخل من الزقاق ده، ودخلنا الزقاق واللي كان مكتوب في لوحته شارع (أهل الأمان شارع 6 زقاق 7 رقم 97) ودخلنا شارع أهل الامان وعينك ما تشوف إلا المجاري والمفروض يسموه شارع المجاري، مويات المجاري على طول الشارع، بهدلت اللي رايح واللي جي والناس ما عرفت تمشي لا برجولها ولا بسياراتها لأنه السيارات اتعلقت من كتر وكبر الحفر والمطبات والحريم اتبهدلوا آخر بهدله من كتر مويات المجاري والمصيبة أنه الشارع ده على صغر حجمه تلاقي سيارات رايحه وسيارات جيه والسكان وأهل الحي تعبوا وهما يتكلموا ويتصلوا وما عندك أحد وكل يوم وموية المجاري تزيد في شارع أهل الأمان وعشان كده كنت أتمنى من العمدة منصور عقيل أنه يقدم شكوى للأمانة والشركة الوطنية بصفته عمدة الحي عشان تجي لجنة تشوف المصيبة دي اللي جابت القلق والتعب لسكان الحي خاصة أنه الحفر والمطبات بهدلت الشارع هدا غير المجاري واللي ما يجي منها الا الامراض وخاصة الكبد الوبائي نسأل الله السلامه، عشان كده اتمنى من الحبايب اللي في الأمانة وفي الشركة الوطنية أنها تخلي بالها من كل الأحياء والشوارع والأزقة اللي بتتبهدل بموية المجاري وتنسق مع الشركات اللي ماسكه هادي المشاريع عشان تريح الناس من هادي البهدله اللي بيشوفوها كل ما طفحت مويات المجاري في الشوارع وزي ما بيقولوا تعب مره ولا تعب كل مره يعني بالبلدي كده شوفوا لها حل مزبوط وريحوا الناس واستريحوا والا انا غلطان يا حبايب وعيشوا كتيييييير تشوفوا كتيييييير
مثل حجازي: جبتك ياعبدالمعين تعينني لقيتك ياعبدالمعين تنعان
abofatoo@hotmail.com