دحين انت جايب معاك خيشة الفحم والقوارير الصغيرة دي كلها ليه؟ حتبخر الحارة كلها؟ والا عندك عزومة مبشور وكباب واوصال ؟ شوف شكلك كيف صار زي جنود الصاعقه وجهك مسود والفلينة ابو عسكري سودت من كتر منت ماسك يد الهوند وقاعد تطحن في الفحم ده .. خلاص خلصتي من مطبق العاده ومعصوب كل يوم انتو ياحريم ما يقدر عليكم الا اللي خالقكم من ساعة ما دخلتي عندي وانتي بللم بللم زي عجايز الرباط وبعدين انتي منتي عارفه ايش الحكاية ؟ وليش بسوي كده ؟ ايش الحكاية ياسيدي فهمني؟ حقولك الحكاية بس دحين امسكي الهوند وشوية الفحم ده واطحنيهم واذا خلصتي من طحن الفحم عبي القوارير دي عشان نوزع للجيران ونكسب فيهم اجر وبلاشي يستخدموا معجون الاسنان .. وايش دخل معجون الاسنان في الفحم والقوارير ؟ انتي دحين سوي اللي قلتلك عليه وانا حقولك الهرجه من طقطق الين باب هيئة الغذاء والدواء.. يقولك ياستي انه هيئة الغذاء والدواء نايمه في العسل ما بتحذر الاوادم من المصايب اللي بتصير الا بعد خراب مالطه وبعد ما تكون الادوية او مستحضرات التجميل او معاجين الاسنان انتشرت واتوزعت في الاسواق وبعد كده انباعت واشتروها الاوادم وبعد ما يكونوا الاوادم استخدموها والا اكلوها والا شربوا هادي المواد سنيين طويله تجي تهرج وتحذر من مواد مسرطنة لانه كل يوم والتاني بنقرا اخبار وتصاريح في الجرايد عن مواد مسرطنة في المأكولات والمشروبات والشامبوهات والأدوية واخر كلام لهم كان الجمعه اللي فاتت كان مكتوب بالبنط العريض لما قالوا وخلي بالك من الكلام اللي قالوه «قررت الهيئة العامة للغذاء والدواء ممثلة في قطاع الدواء منع استخدام مادة الترايكلوسانTriclosan» المستخدمة حاليا كمادة حافظة في مستحضرات التجميل ومعاجين الأسنان بعد أن اتضح من خلال الدراسات أن المادة غير آمنة بسبب تفاعلها مع مادة الكلور الموجودة في الماء، ما ينتج عنه مادة سامة ومسرطنة، عشان كده تبغاني ارسل القوارير للجيران عشان يستخدموا مطحون الفحم وينظفوا اسنانهم .. عليكي نور وحيشوفوا كيف حتكون بيضاء ونظيفه لانها ماركة ابو فتو وبيقولوا كمان انه الدراسات اثبتت أنها قد تتسبب في حدوث تشوه للأجنة. وقالت الهيئة في بيان لها إنها ((ستعمل مستقبلا على تحذير المواطنين من أي منتجات تضاف لها المادة.)) ياعيني على النصيحه وياعيني على الكلام اصلوا الكلام ما عليه جمرك .. شايفه كيف زي ما قلتلك بعد خراب مالطه تصحى اللي اسمها هيئة الغذاء والدواء وتجي تهرج وتحذر بعد ما يكونوا الاوادم كلهم اتسمموا واتسرطنوا.. في كل بيت في معجون اسنان ومستحضرات تجميل وبالدرازن والاوادم ياغافل لك الله شغالين يتمعجنوا صبح وليل والحريم والبنات طول الوقت قدام المرايه ومافي الا احمر واصفر وازرق وتجي تقولهم يا هوه كده ما يصير يردوا عليك بعيون قوية انت ايش عرفك بالماركات .. طيب خلي الماركات تنفعكم .. يا هيئة الغذاء والدواء خافي الله في الناس حرمتي بعض من البنات المتزوجات من الانجاب بموت الأجنة لانه الاكسجين ما يوصل للجنين وكله من تحت راس مادة ترايكلوسان اللي تمنع وصول الدم إلى الرحم، يامسؤولي هيئة الغذاء والدواء ياريتك حطيتي صورة لانواع المعاجين ومستحضرات التجميل اللي حضرتك عارفة انها مسممه ومسرطنه عشان الناس تاخد بالها منها وتعرف راسها من رجولها وياريتك كمان كنتي كتبتي اسماء الشركات واسماء التجار اللي جالسين يتاجروا بصحة الناس وعافيتهم وما يهمهم الا الفلوس والا انتي قلبك على التجار والشركات وخلق الله مالهم قيمه عندك يروحوا فطيس .. يا مسؤولي هيئة الغذاء والدواء فرصعوا وفتحوا عيونكم كويس على المنتجات المسرطنة والمسممه قبل لا تدخل البلد واللي فينا كافينا وعيشوا كتيييييير تشوفوا كتيييييير . مثل حجازي/ البضاعة البايره تقول للتاجر استنيني حتى يجيء أعمى قلب يشتريني. [email protected] للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة
