قبل لا أدخل في هرجتي حق اليوم أحب أقول لكل حبايبي القراء كل عام وانتو بخير وعيدكم سعيد وأسأل الله سبحانه وتعالى انه يتقبل مننا ومنكم الصيام والقيام. وتعالوا دحين نشوف هرجتنا ايش بتقول، أكييد كتيير من الحبايب اللي سكنوا في جدة القديمة يعرفوا حي باب شريف اللي في وسط البلد واللي ما يعرف باب شريف من القراء اللي من خارج جدة أقول لهم باب شريف من أقدم الشوارع في مدينة جدة وفيه حركة تجارية كبيرة لأنه امتداد لمجموعة كبيرة من الأسواق القديمة زي سوق العلوي وشارع قابل وسوق الندى وباب مكة .. وشارع باب شريف أو سوق باب شريف زي ما يحبوا الناس يسمووه امتداد لحواري قديمة معروفة ومشهورة محاصرتو من كل الجهات زي حارة الشام وحارة اليمن وحارة البحر وحارة برا، لكن المصيبة ان الزين مايكمل رغم انه سوق من أقدم الأسواق في جدة وفيه حركة تجارية كبييرة إلا أن أصحاب ونشات (الخالدية) في هدا الشارع جابوا لأصحاب سوق باب شريف وزباينه الهم والغم والقرف مايتركوا سيارة إلا وسحبوها على حوشهم ويخلوا أصحاب السيارات المسحوبة يدوخوا السبع دوخات لما يلاقوا سياراتهم.. مايتركوا سيارة واقفة على امتداد الشارع إلا وسحبوها رغم إنه مافي لوحات ولا إرشادات توضح ان الشارع ممنوع الوقوف فيه .. أنا ماني عارف مين اللي سمح لأصحاب ونشات (الخالدية) انهم يسحبوا سيارات الناس من دا الشارع التجاري؟ ومن مين أخدوا الأوامر؟ ومين اللي سمح لهم ؟ ومين هوه المستفيد من الحكاية دي ؟ ايش هدا الظلم والاضطهاد اللي جالس بيصير للناس في شارع باب شريف اللي بيسمووه (شارع الذهب)، فين أصحاب الدكاكيين يوقفوا ؟ فين زباين السوق يوقفوا ؟ إذا ونشات الخالدية كرهتهم عيشتهم وحياتهم ..كل سيارة تنسحب ب 100ريال وشوفوا كم سيارة بتدخل حوشهم رغم انهم واقفين وقوف نظامي (وقوف طوولي) ولا عطلوا حركة سير السيارات ولاشي، لكن الحكاية كلها ( امسكلي واقطعلك ) وهات كم سيارة على الحوش وبعدين نتحاسب والله شي مخزي وعيب دا اللي جالس بيصير في شارع باب شريف، إنها مهزلة في مهزلة لما يتحكم في مصير الناس مجموعة من سواقين الونشات اللي ما يهمهم إلا قد ايش يدخلوا من مئات الريالات في جيوب مؤسستهم المحترمة واللي جالسة تأكل أموال الناس بالظلم والحرام لأنهم بيسحبوا سيارات الناس من غير وجه حق .. وكله كوم واللي بيسووه مجموعة من مراقبي البلدية المتفزلكين لأصحاب البسطات كوم يجيك المراقب المتفزلك الساعة 12 من ليلة العيد وخلوا بالكم الساعه 12 من ليلة العيد يعني لسه في ناس ما اشترت أغراضها ولا حاجاتها لكن بعض طيبين الذكر من مراقبي البلدية ما يتركوا الناس تسترزق رغم انك دافع رسوم على بسطتهم اللي ما يعطوك تصريحها إلا بعد ما يمرمطوك ويبهدلوك آخر بهدلة وهدا هوه شغل الأمانة إن ما تعكنن على الناس ما ترتاح.. المهم نرجع لأصحاب البسطات، الساعه 12 في الليل من ليلة العيد كنت في باب شريف والشارع كله بسطات اللي يبيع حلاوة العيد واللي يبيع الأجبان والمخللات واللي يبيع الكبدة. وجووا مجموعة من مراقبي البلدية المتفزلكين وقالوا لأصحاب البسطات شيلوا قشكم والا تجي الشيوالات وتقلبها عليكم فوقاني تحتاني.. هادي هي أخلاق مراقبي البلدية وأصحاب البسطات يترجوهم ياناس ياهوه لسه بدري والليلة ليلة عيد خلونا على الأقل للساعة 3 مافي فايدة قلوب متحجرة قلوب ما عندها رحمة ومو فالحين يردوا عليك إلا نحنا عندنا تعليمات وهما ما عندهم لا تعليمات ولا غيرو كل اللي عندهم كيف يبهدلوا خلق الله في أرزاقهم. والله عييب عييب دا اللي جالس بيصير لأصحاب البسطات خاصة في ليلة العيد. عشان كدا بقول إذا كان الحكاية حتستمر كدا لأصحاب البسطات في ليلة العيد خلاص من بدري لا تعطوهم تصاريح عشان بسطاتهم ولا تتعبوهم وتوجعوا قلوبهم ( امنعوهم وريحوهم ) وبلاشي من عادات أهل جدة. وزي ما دمرتوا المنطقة التاريخية والأسواق القديمة باب مكة وشارع قابل وسوق الندى وسوق العلوي ببلاطكم الحجري دمروا كمان عادات أهل جدة بقراراتكم التعسفية عشان ترتاحوا وتريحوا.. وحسبي الله ونعم الوكيل. وعيشوا كتيييير تشوفوا كتيييييير. [email protected] للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة
