عاجبكم كده يا مرورنا !

بالبلدي الفصيح

دحين انت الييين متى حتقعد تلف وتبرم في الشارع ده جبتلي الصداع من كتر اللف والدوران ؟ انتي عارفة دحين هدا الشارع ايش اسمه؟ ايوه عارفة يخويا شايفني حجية، ايوه أعرف نحنا ماشين في شارع باب شريف أقدم شارع في جدة اللي تتوزع منه كل حارات جدة القديمة زي حارة المظلوم وحارة الشام وحارة البحر وحارة اليمن وحارة بره، وشوف قدامك مركاز عمدتنا (طلعت غيث) وشوف هنا في نفس الشارع هدا الدكان الصغير كان دكان أبوك أشهر حلواني في جدة ( بن علي الله يرحمه ). صح كلامك يس دحين صار اسمه شارع الذهب وكانوا كل الحبايب القدامى ساكنين هنا عوائل وناس كانت ومازالت عزيزة على قلوبنا، لكن خلاص الزمن شعترهم وكل واحد صار مشغول بحياته .. خلاص ياسيدي وقف هنا جسمي ادهمل من كرسي سيارتك المهكعة .. شوف الحرمة يعني أنا اللي مبسوط من اللف والدوران جالس أبرم زي المدوان رجولي ورمت وبققت وتعبت وأنا شوية أمسك كلتش وشوية أدعس بنزين وشوية أكفش فرامل قاعد با أدووور على موقف أركن فيه السيارة .. طيب خلاص أهو ده موقف أركن السيارة هنا مع سيارات الأوادم دوول وكفاية لفلفة ودوران .. المهم ركنت السيارة مع الأوادم.
ودخلنا سوق باب شريف اللي تغيرت ملامحه، فين أيام باب شريف اللي كان له شنة ورنة المهم أخدت الحرمة ودخلنا السوق عشان نشتري شوية عازات والحمد لله انه ما كان في ولا علامة ولا لوحة بتقوول إنه الوقوف ممنوع، وخلوا بالكم أنا ايش بقول مافي ولا علامة ولا لوحة ولا عسكري حتى بتقول إنه ممنوع الانتظار أو الوقوف على امتداد شارع الذهب الرايح والجي، وبعد ساعة زمااان ياحبايب رجعت أدور على السيارة ما لقيتها في الموقف اللي ركنتها فيه وشوية أسمع واحد من أصحاب الدكاكين يقول لي: يبو فتوو ترى صاحب الونش سحب سيارتك اللي واقفة صح مع بقية السيارات اللي برضو واقفة صح وسحبوها على حوشهم الكبير، هادول أصحاب الونشات مافي أحد قادر يوقفهم عند حدهم يبغوا يلملموا فلوس من عباد الله بأي طريقة وبعدين الغلة آخر النهار تتوزع عليهم وكل واحد وشطارته والشاطر يفهم فوضى من جد فوضى ... وشوية أسمع الحرمة بتقول ربنا يستر لا يكونوا كتبووا عليها تالف وودوها التشليح ؟ برضنا ما تسيبيكي من النكد والخزاوة أنا مو ناقصك المهم بعد لفلفة ودوران في الأزقة وبعد حاني وماني وصلنا لحوووش كبييير وشوف عاد السيارات المسحوبة يا كترها لأن أصحاب الونشات ما يهمهم السيارة واقفة غلط أو واقفة صح طالما انت يا مليح حتكع قيمة سحب السيارة اللي بيلهفوها وما تفرق معاهم حلال حرام مو مهم.
المهم وصلت عند المسؤولين على الحوش الكبير كانوا متعنطزين وشايفين نفسهم ويتكلموا من طرف خشمهم وياريتهم من أولاد البلد إلا بشكة حبرتية، وكلمت واحد منهم وقولت لو: السيارة انسحبت من مكانها ومافي ولا تعليمات ولا لوحة بتدل على عدم الوقوف، رد عليا بكل جلافة وقوة عين: هادي تعليمات المرور ويدك على 100 ريال عشان تاخد سيارتك وبلاشي من كتر الكلام .. عجيب أساسا انت من سمحلك انك تسحب سيارات الأوادم وبأي صفة ؟ هادي تعليمات المرور .. تعليمات المرور بتقول لك اسحب أي سيارة، وبعدين فين تعليمات المرور على امتداد شارع الذهب مافي ولا تعليمات ولا لوحة بترشد الناس على انه الوقوف ممنوع والا الحكاية أمسكلي واقطعلك، أصله الحق مو عليك الحق على اللي خلاك وسمحلك تسحب سيارات الأوادم وتبهدلهم البهدلة دي هدا غير انه أغلب أصحاب السيارات كانوا زعلانين من أصحاب الونشات لأنه أصحاب الونشات العربجية كسروا سياراتهم من كتر ماهما قاعدين يسحبوها في الشوارع لأنه هما ما يهمهم السيارة ولا صاحبها كل اللي يهمهم قد ايش يدخل في خزينة مؤسستهم المحترمة، لكن ايش نقول يا بخت من كان النقيب خاله... وعيشوا كتييير تشوفوا كتيييير.
abofatoo@hotmail.com
فاكس: 6764070
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة