سرقوا الإقامة

بالبلدي الفصيح

خير ياعم قايد ايش بك مهموم ومضايق مو عوايدك ؟ خليها على الله يابوفتو، ايش في قلقتني؟ اسمع مني دي الحكاية وبعدين انت احكم، قول الحكاية سمعني، يبو فتو كنت راكب في الاتوبيس حق خدمات جدة ابغى اروح مشوار ولما وقف صاحب الاتوبيس عند المكان اللي ابغاه دخلت يدي في جيبي عشان احاسبه مالقيت المحفظة اللي فيها الفلوس والاقامة الله عالم مين سرقها من كتر زحمة الركاب اللي في الاتوبيس وسألت صاحب الاتوبيس والركاب كلهم قالوا ماشفنا شي. المهم واحد من الركاب قال لي لا تشيل هم انا ححاسب على مشوارك بس انت لا تخاف روح اسأل عنها في سوق الجاليات وانت حتلاقيها هناك، وفين دا السوق ياعم قايد ؟ هدا يبو فتو في جنوب جدة في شارع غزة قبل ما توصل لسوق باب مكة، اها طيب كمل، المهم رحت إلى السوق اللي قال عليه الراجل وجلست اتلفت يمين وشمال يمكن يجي احد يكلمني وشوية جاني واحد وقال لي شكلو اقامتك ضايعة او مسروقة ؟ قلت له انسرقت كل المحفظة بفلوسها واقامتها، قال لي خلاص اعطيني اسمك ورقم جوالك وانت وحظك، بس اهم شي ياعم قايد تكون بلغت عن ضياعها ؟ اكيد يبو فتو بلغت عنها. المهم بعد كم يوم دق الجوال عندي، وقعدت اتكلم واقول الاقامة حقي عندك، حصلتها مرمية في الشارع، جزاك الله خير انك اتصلت عليا، طيب انت فين مكانك؟ والا فين عنوانك؟ وايش اسمك؟ انت موجود في السوق وانقفل الجوال ورجع الجوال دق تاني بس كلمني واحد تاني غير الاول ايوه انا قايد اذا ابغى الاقامة كم ادفع، 3000 ريال بس هذا كثير، خليتها 2500 يعني دا آخر كلام المهم، اخدت بعضي ورحت إلى السوق ودقيت على الجوال اللي اتصل عليا لقيتوا مقفل وشوية يجيني اتصال من رقم تاني وشخص تاني غير اللي كلمني اول وقال لي انت صاحب الاقامة المسروقة قلت له ايوه قال اعطيني اوصافك وايش لابس وقفل الجوال وارجع اتصل عليه الاقية مقفل جواله وشوية يجيني اتصال من رقم تاني قال لي خليك ماشي على الرصيف انا شايفك وجهز فلوسك عشان تاخد اقامتك وانا بمشي على الرصيف يجيني واحد طول بعرض مسك يدي وقال هات الفلوس عشان تاخد اقامتك اعطيتو الفلوس اللي اتفقنا عليها واعطاني اقامتي واختفى من قدامي ورجعت اتصل عليه عشان اشكره لقيت جواله مقفل وشوية يجيني اتصال من رقم تاني يقولي انت قايد قلت له ايوه قال لي لما تضيع اقامتك تاني مرة تعال على السوق على طول وقفل الجوال في وجهي. ايش رايك يبو فتو هادي كل الحكاية ؟ والله مدري ايش اقول لك على العموم قول الحمدلله انه الاقامة حقتك رجعتلك والله يعوضك في الفلوس اللي دفعتها بس نصيحتي لك لما تركب الاتوبيس تاني مرة خلي بالك من جيوبك ومحفظتك واقامتك واذا لا سمح الله ضاعت او انسرقت إقامتك بعد كدا روح على سوق الصومال وأكيد حتلاقيها عندهم زي ما قالك واحد منهم.. وعيشوا كتيييير تشوفوا كتيييير.
abofatoo@hotmail.com
للتواصل أرسل رسالة نصية sms إلى 88548 الاتصالات أو 636250 موبايلي أو 737701 زين تبدأ بالرمز 150 مسافة ثم الرسالة