سكن يا مسؤولين

بالبلدي الفصيح

وقفت سيارتي عند باب العمارة الساعة خمسة العصر وأنا عارف حتقولوا ليه الساعة خمسة العصر لأنه يا حبايب الشغل في القطاع الخاص عاوز كده وطالما جيت الساعة خمسة العصر وعلى بال ما تتغدى يكون المغرب أذن وبعدها تصلي العشاء وراح اليوم عليك يا مليح... أنا ماني عارف إيش اللي يمنع انه يكون الدوام في القطاع الخاص اليين الساعة تلاته ما يكفيهم انهم بياخدونا لحم ويرمونا عظم حتى يوم الخميس دوام يا بختهم موظفين الحكومة ما تجي الساعة اتنين الا وهما في بيوتهم هدا اذا ما فقعوا بعد صلاة الظهر ما علينا نرجع لهرجتنا وقفت سيارتي عند العماره الا واشوفلك سيارة نقل العفش الكبيرة وشايف عم معتوق جالس يشيل في عفشو هوه وعمال شركة النقل واسمعو يقول بلكنتوو الحجازية الحلوة خلي بالك ياواد لا تكسر الطربيزة نحنا مو ناقصين مصاريف ... وأول ما شافني قالي هلا يبو فتو كيف حالك ؟ الحمد لله وانت كيفك وعلى فين كدا ياعم معتوق انت بتحول ولا ايه ؟؟؟ ايوه محول يا سيدي انته ناسي مو انا كلمتك قبل شهرين اني راح انقل لانه صاحب العماره رفع الإيجار عليا ومو راضي يخلينا نسكن عندو بنفس الإيجار القديم عشان كدا قاعد (الم عفشي) وزي مابيقولو مد رجلك على قد لحافك وزي منته عارف هادي غلاق تالت مره انقل من شقتي.. الشقة الأولى كانت المويه تنقطع فيها على طول وفي الشقة التانية كانوا الجيران مو مزبوطين وهادي الشقة التالته بسبب الإيجار والله عالم شكلو النقلة الرابعة حتكون على مقبرة أمنا حواء من كتر الهم والغم اللى نحنا عايشين فيه وبعدين أنا ماني عارف أصحاب العماير بيرفعوا الإيجارات ليه وهما عارفين انه الأوادم بتسكن في أربعة جدران أو خمسة يعني شقق ما فيها لا مسابح ولا نادي رياضي ولا حتى حديقة ترد الرووح وتجي تسأل على الإيجار يقولك 35 ألف وإلا 25 ألف على ايه ما تعرف الإيجارات ترتفع ولا أحد يهرج ويتكلم وما في قانون يحمينا من أصحاب العقارات يا ريت المسؤولين يشوفوا حل لهادي المصيبة اللى بيعاني منها سبعين في المية من أهل البلد لانه نحنا أهل الدخل المحدود الله عالم بحالنا نستلم الرواتب من هنا وتتوزع من هنا شويه للإيجار وشويه للكهرباء وشويه للجوال والهاتف وشويه لمصاريف المدارس والبيت من فين حنقدر نشتري أرض ولا حتى نعمرها وإذا قدمت على منحة أرض يعطوك هيه في خلا خالي والرب عالي وعاد حلني لما تجيك الخدمات يبغالك 40 سنة .. 20 سنة على بال ما تجيك المنحة و20 سنة على بال ما تجيك الخدمات والله عالم تكون موجود والا ترووح للورثة والا يعطوك منحة جنب وادي عشان السيل يجيب خبرك وتروح في خرخر .. والله ماني عارف ايش اقولك يا عم معتوق الأراضي في البلد على قد مد البصر ليش ما يكون في شركات مقاولات كبيرة تتفق معاها الحكومة ويخططوا هادي الاراضي ويبنوها ويوزعوها وحدات سكنية على أهل الدخل المحدود وتتقسط من رواتبهم على فترات زمنية معينة وبعدين أهل الدخل المحدود مو غريبين على التقسيط حياة المواطن البسيط كلها أقساط في أقساط والأهم من ده كلوو انهم ما يسلموا هادي الوحدات السكنية للبنوك لانه البنوك ذمتهم واسعه حيسلخوهم من كل شق وطرف وبلاشي من منح الأراضي اللي ما تجي الا بعد طلوع الروح حتى لو جات الأرض من فين حيجيب فلوس عشان يبنيها وهوه مفلس وحالته بالبلا والبلا لاحقوو أتمنى من كل قلبي انه يكون في حل لحكاية السكن اللي بيعاني منه كتيير من الناس عشان يعيشوا حياة كريمة في بلد غالي وكريم ويفتكوا من دقدقت البيبان كل نهاية شهر وعيشوا كتييييير تشوفوا كتييييير.
abofatoo@hotmail.com
فاكس : 6764070
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة