يا الله بعودة

بالبلدي الفصيح

صباح الخير والفل والياسمين يا حبايب وكل عام وانتو بخير وعيد سعيد عليكم وعلى جميع أمة محمد، وأسأل الله سبحانه وتعالى انه يتقبل مننا ومنكم الصيام والقيام ويعيد علينا شهر رمضان ونحنا وانتو بخير وصحة وسلامة قولوا آمين.. رجعت من صلاة العيد وشوية أشوف أم فتو قاعدة بتجهز في الفطور اللي هو فطور أهل البلد جبنة وزيتون وامبا واشار ولدو ولبنية وهريسة وحلاوة بلدي وزلابيا ومختوم ودبيازة (ومنزله) لحم بالطحينية يعني ما شاء الله تبارك الله سفرة متروسة، المهم وأنا بفطر جات عيني على أم فتو لقيت دمعتها نازلة على خدها قلت لها صلي على النبي ايش لزمة البكاء دحين واليوم نحنا في أول أيام العيد.. ردت عليا وقالت: أذكرت أيام زمان كيف كان العيد أيام ما كنا نلعب في الزقاق بربر وشرعت وشبر وكبت ونركب المداااريه وناكل بليلة وحلاوة مشبك ومنفوش ودجاج البر ونلبس كرتة وكوندرة ونكد شعرنا ونغطيه بالمسفع ونروح إلى المشهد نصلي العيد ونلم العيدية من عند سيدي.. خلاص يا ستي هاديك الأيام الحلوة ولت.. الأيام هادي تشوفي الناس تجري في الأسواق عشان يجهزوا بيوتهم بالمفارش والكنبات والتحف وبعدما يصلوا صلاة العيد تلاقي كل واحد قفل بابه وهات يا شخير ولا يعرفوا العيد ولا يدروا عنه، عيد الزمن دا عند بعض الناس عيد النوم فين العيد زمان تلاقي البيوت مفتوحة من بعد صلاة العيد وكل واحد يجي يسلم على جاره ناس داخلة وناس خارجة مو الزمن دا الجار ما يجي يسلم على جاره، حتى المعايدة صارت برسايل الجوال والا في الاستراحات حتى العوايل صاروا ما يدخلوا بيوت بعض يتلموا في استراحة كلهم تاني أو تالت العيد وخلاص وعلى كدا انتهى العيد عندهم يللا الله يهدي عباده.. وشويه أشوف فتو جية عليا وبتقول لي اليوم أبغى أروح إلى الملاهي أو نتمشى على البحر.. أي ملاهي وأي بحر يا بنتي الملاهي الأيام هادي مزحومة زحام ما يعلم به إلا الله وكل الدعاية والإعلانات اللي بيسووها كلها سحبت رجل، هدا هوه شغل أصحاب الملاهي في الاعياد حينفضوا جيوبنا بأسعارهم اللي تقصم الظهر التذكرة بالسعر الفلاني هدا غير الأكل والشرب اللي حتكون أسعاره نار وكله حيكون بالدبل مو جدة غير، وهادي الأيام عيد وطالما فيها عيد يعني حننفض جيبك يا مليح وإن كان على البحر البلد ما عاد فيها بحر.. البحر كله صار شاليهات وكباين يعني بالبلدي كدا عشان تشوف بحر ربنا لازم تدفع فلوس، ونصيحتي لكي انك تزهمي بنات العمارة وتطلعي معاهم على السطوح وتلعبي معاهم بربر وزقيطة ونط الحبل وكمان حتلاقي في السطوح كم مرجيحة وزحليقة واقعدي ألعبي مع البنات الين تطفشي وأنا راح أخلي أمك تسوي بسطة في السطوح تقلي بطاطس وتسوي سندوتشات هامبرجر وعصير توت عشان اللي تبغى تأكل من البنات تجي تأخد اللي تبغاه وبلاشي من وجع الدماغ وزحمة الشوارع اتفقنا يا فتو.. اتفقنا يا بويا.. وشوية أشوف أم فتو قاعدة بتجهز بسطتها وبتقطع البطاطس زهمت عليها وقلت لها يا أم فتو، يا أم فتو، نعم ياسيدين لا تنسيني واحد صحن بطاطس وكتري الشطيطة.. وعيدكم سعيد وكل عام وانتو بخير وصحة وسلامة.. وعيشوا كتيييير تشوفوا كتيييير.
للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 150مسافة ثم الرسالة