شارع قابل وليالي رمضان

بالبلدي الفصيح

ياسلام على رمضان وليالي رمضان، أهو اليوم نحنا 26 في الشهر وأسأل الله سبحانه وتعالى انه يتقبل مننا ومنكم الصيام والقيام في ايامه اللي فاتت ونسأل الله سبحانه وتعالى انه يعيننا ويعينكم على صيامه وقيامه في بقية الايام الجية، وعيدكم سعيد وكل عام وانتو بخير وصحة وسلامة، وياسلام على رمضان وليالي رمضان لما تخلص من صلاة العشاء والتراويح وتوقف سيارتك عند مسجد الجفالي وتنزل كعابي على جدة القديمة وتشوف مراكيزها وتذكر بشكات الحبايب اللي كانت موجوده واللي كانت بتسوي دوري الكيرم والبلوت وياسلام كمان لما تدخل حاراتها وأزقتها ودخاشيشها وتذكر ايام وليالي هذا الشهر الفضيل وتذكر ابوك وامك لما يسألوك هااه ياواد صايم والا لا؟ وتقول ايوه صايم وانت لا صايم ولا شي وطول النهار وانت تقرقع من موية الزير وتذكر كمان اهالي وعوايل وبيوتات قديمة كانت عزيزه وغالية على قلوبنا وما زالت، ويا سلام كمان لما تعرج على سوق الندى وشارع قابل وتشوف حركة السوق في ليالي رمضان وتشوف اشكال وألوان من البسطات، بسطات بياعين الكبده والمنتشره على طول شارع قابل وسوق العلوي ومن اشهرها كبده المعلمي وكبدة العم يحيى جاوه وكبده الشوربجي لانه هادي عادات اهالي جدة من اربعين وخمسين سنه لانه الآباء اشتغلوا بعادة اجدادهم والابناء اشتغلوا بعادة آباءهم وكل جيل بيجي بيشتغل بهادي العاده اللي بنشوفها كل سنه في رمضان وان شاء الله تدوم ولا تنقطع، وتشوف كمان بسطات البخور العودة وبسطات حلاوة العيد والكل بينادي «يا حلاوة العيد يا حلاوة من مال جديد يا حلاوة اشكال وألوان يا حلاوة» هذا غير بسطات البليله واللي تسمعهم وهما ينادوا على الزباين وبيقولوا «يابليلة بللوكي، سبعة جواري خدموكي، وبالخل والكمون خللوكي»، هدا غير بسطات عازات الدبيازة ويا سلام على الدبيازة لما تفطر عليها ليلة العيد هدا غير بسطات الاجبان والزيتون والامبا والطرشي والاشار والحلويات البلدي الهريسة واللبنية والنارجين واللدو، بس الحلو ما يكمل في شارع قابل ولا في سوق الندى لوجود المتسولين وياريت الحبايب المسؤولين يشوفوا لها حل لانها بتشوه صورة البلد عند السياح اللي بيجوا على جده سواء للعمرة او للزياره، أعداد كبيرة ومهولة من المتسولين رجال وحريم وأطفال والمنتشرين بشكل كبير على أرصفة شارع قابل وسوق الندى وفي منهم بيعرضوا عاهاتهم وأمراضهم باشكال مقززة ومقرفة على المتسوقين هدا غير وجود الباعه المتجولين واللي بيفترشوا السوق وبيعرضوا بضاعتهم للمتسوقين هدا غير وجود حمالين يا كترهم في كل شارع وزقاق من أزقة سوق الندى وشارع قابل والمصيبه انه ده الحمال يلصق فيك حتى لو كان في يدك كيس واحد. عشان كده بقول للمسؤولين في امانة جدة وفي مكافحة التسول واللي تهمهم المنطقة التاريخية ويهمهم كلامي دخيلكم دبروها وحلوها وريحونا من هادي المناظر اللي شوهت صورة أقدم سوق تجاري في مدينة جدة.. وعيدكم سعيد وكل عام وانتو بخير وصحة وسلامة.. وعيشوا كتييير تشوفوا كتييييير
abofatoo@hotmail.com
للتواصل أرسل رسالة نصية sms إلى 88548 الاتصالات أو 636250 موبايلي أو 737701 زين تبدأ بالرمز 150 مسافة ثم الرسالة