ياسلام على أيام وليالي رمضان، أيام كلها خير وعبادة، بعض الناس من يوم ما يدخل الشهر الفضيل ومن أول أيامه تلاقيه مجتهد ونشيط بيصلي الصلوات في المسجد وتلاقيه في أول الصفوف وبعد عشره أيام بس تلاقي أخينا (تنح) وما يقدر يتزحزح من مكانه، تلاقيه يفطر الييين ما (ينبشم) عشان كده بقول ياحبايب المعده بيت الداء، على مهلكم في الفطور وانتو عارفين إنه وراكم صلاة مغرب وعشاء وتراويح ، هدا غير المدخنين منهم، تلاقيه أول ما يخلص من فطوره أو يمكن كمان بعد ما ياكل التمره تلاقيه ولع سيجاره وهات يا شفط ونفخ فيها، تلاقي أخينا جسموو اتخدر من البلا اللي شفطووا، صدقووني يامدخنين ويامدخنات فرصه كبيره ما تتعوض حاولوا في هدا الشهر الفضيل إنكم تبعدوا عن التدخين وحافظوا على قلوبكم وصدوركم من هدا السم اللي بهدلكم وبهدل كيانكم. هدا غير زحمة الفول وما أدراك ما الفول، تشوف الزحام والغشنه والمشاكل والمضاربات كأنهم ما بياكلوو فول إلا في رمضان، ايش فيها لما أشتري فول حق كم يوم ويتسخن في البيت بدل هادي البهدله ووجع الراس، هدا غير انه في ناس ما يحلا لها انها تشتري أغراضها إلا قبل المغرب وتلاقي أخينا يشتري أشكال وأصناف كتييره من الأكل ولما يفطر ما يتاكل من هدا كله ولا شي. عشان كده نصيحتي للحبايب لا تحاولو انكم تشتروا شي قبل المغرب لأنه البني آدم سبحان الله يحس داك الوقت انه جيعان ويبغى ياكل أي شي .. هدا غير ستات البيت تلاقيها من بعد صلاة الظهر الين ما يأذن المغرب وهيه متسمره في المطبخ وما تسمع إلا قربعة القدور وزبادي التطلي والماسيه.. هدا القدر على النار ودي الصينية جووة الفرن وقمر الدين في الخلاط، تلاقي المطبخ انقلب حراج وتشوف السفره مليانه أصناف وأشكال من الأكل وياريتوو يتاكل، لا والمصييبه الكبيره انها لما تسمع أذان المغرب تلاقيها تزعق وتزهم يابنات اعطووني تمره خلوووني أفطر وهيه جووة المطبخ. ياناس ياهووه والله رمضان مو كده رمضان شهر عباده وصلاة لكن ايش اقول الله يهدي ما خلق.. هدا غير نزلة الأسواق في ليل رمضان تلاقي الأسواق والمولات والمراكز التجارية مليانه بالرجال والحريم، والبنات يبغووا يستعدوا عشان يشتروا ملابس العيد يا سبحان الله يعني اللفلفه والدوران ما تجي إلا في ليالي رمضان؟ فينكم من رجب فينكم من شعبان يردوا عليك بفم مليان وعيون قويه الموديلات الجديده ما تنزل إلا في رمضان .. أي موديلات وأي خرابيط ياسبحان الله مهتمين بالموديلات وتاركين العباده .. يانااس ياهووه والله رمضان مو كده والله رمضان مو كده، وكل مين بعقله يعيش .. وعيشوا كتييير تشوفوا كتيييير. [email protected] فاكس : 6764070 للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة
