كل عام وانتو بخير وصحة وسلامة ياحبايب وجزاكم الله خير على مواساتكم وتعزيتكم ليا في وفاة والد زوجتي رحمه الله وأسأل الله العلي القدير أن لا يريكم مكروه في عزيز لديكم، وتعالوا دحين نشوف ايش بتقول هرجتنا حق اليوم. أمي يا أمي ايشبو أبويا من ساعة ما دخل البيت وهوه يضحك ؟ والله يابنتي علمي علمك بس تعرفي أبوكي كبر في السن وبدأ يخطرف ادعيلو انه ربنا يحسن خاتمته، يحسن خاتمتي هااه سامعك أنا، انتي وبنتك جالسين تودودوا عليا صار كدا يا أم فتو برضك ما تبطلي من الخزاوة حقتك تبغي تتخلصي مني ؟ سامحني ياسيدي بس نحنا شوفناك بتضحك وتخطرف قلت خلاص الراجل قرب على أمنا حواء، صار كدا، أنا بضحك لانه شر البلية ما يضحك، وايش هية دي البلية ياسيدي؟ البلية دي بتقول لجنة ثلاثية لتوزيع 500 مراقب أسعار على مناطق المملكة، والخبر دا كان منشور قبل 240 يوم وليومك ما شفنا لا مراقب ولا غيرو وكل وزارة حكومية بترمي على التانية، وزارة الخدمة المدنية بترمي على وزارة التجارة ووزارة التجارة بترمي على وزارة المالية وكل وزارة بتقول (نحنا مالنا شغل وسعيد سف الدقيق) والحبايب في وزارة الخدمة المدنية ووزارة التجارة ووزارة المالية داخلين اجتماع وخارجين من اجتماع ودخلوا لجنة وخرجوا من لجنة ولا تعينوا مراقبين ولا يحزنون وكأنك يبو زيد ما غزيت، وقبل أسبوع جابت وزارة الخدمة المدنية (العيد) وقالت بالفم المليان: لا يوجد لدينا وظيفة «مراقب أسواق»، (ياعيني) وما تبغيني أضحك يا أم فتو أنا مو أضحك بس أنا أكركر كمان، 240 يوم عشان يستحدثوا وظيفة مراقب أسعار، طب استحدثوا وظيفة مراقب أسعار ايش المشكلة وخلوا المراقبين يشوفوا شغلهم والا انتو عاجبكم الحال اللي جالس بيصير في الأسواق والله من جد مصيبة، وبعدين يكون في علمك وزارة الخدمة المدنية هادي عاداتها مو غريب عليها دايما ماعندهم مسميات للوظايف حتى للمتخرجين من الجامعات والدليل خريجي التقنية والكيمياء الحيوية هدا غير المهندسين اللي بتعشمهم بالوظايف من سنين طويلة، لكن الواحد ايش يقول إلا عيشوا كتيييييير تشوفوا كتيييييير. [email protected] للتواصل أرسل رسالة نصية sms إلى 88548 الاتصالات أو 636250 موبايلي أو 737701 زين تبدأ بالرمز 150 مسافة ثم الرسالة.
