هذا المكشات اللي يسرّك ليا جيت يبرد غليل اللي نوى سجّة البال

في موقعٍ يِسر كَشْتة نشامى
فيه استراحوا والمواتر مِستظله
يَامَا نِشوف بمدننا زين يَامَا
لكن جمال البر ازْين وفَلَّه
نسايمٍ تِنعش ونبت الخزامى
وغطَّا الخضار الارض كِنه مظلَّه
موطني لعلّه حلو الغماما
يَرويه غيثه والسَّعد مَدْهلٍ لَه
سعود عائش الحربي - جدة
بعد الحمايه أصبحت ظل واشجار
بحماية الدولة جنينا ثمرها
مكشاتها مع ظلها وقت الامطار
شوفوا المواتر تستظل بشجرها
الله يديم الأمن في كل الاقطار
بحماية الدولة إلى أقصى بحرها
سليمان بن عبدالعزيز السنيدي - الرياض
هذا المكشات اللي يسرّك ليا جيت
يبرد غليل اللي نوى سجّة البال
لا صار في صدرك من الهم عفريت
والنفس في ضيقة وفي كثرة أعمال
نصيت لك بر بعيدٍ عن الصيت
ما بين طلح وسدر ربعٍ على العال
تنسى همومك لو اهمومك كبر هيت
تعيش يومك والمقادير تجتال
خالد بن ناصر المخيمر - روضة سدير
يا زين شوف الشجر مع منظر الوادي
اصغر شجرها يظلل سبع سياره
فلّوا الفرشه وهم بالمنظر سعادي
خوة رجال ما فيهم ناس عياره
حمد عبدالله الوايلي - حوطة سدير
نرحب بمشاركاتكم الشِّعرية، وما تلتقطه عدساتكم
من الصور الهادفة والطريفة على إيميل الخزامى:
rb-khozama@alriyadh.com
صورة العدد السابق