الماء تجمّع بين وديان وجبال من مزنةٍ هلّت وماها هماليل

ياما حلاة السيل يا زين شوفه
بين الجبال اللي له القلب يرتاح
في منظر يعجبك يصعب وصوفه
بسيلٍ يسر القلب يفرحك إلى طاح
أنا أشهد إن العين بشوفه لهوفه
الله يديم الخير .. ويديم الأفراح
والناس لاجاء السيل دايم شغوفه
تبي الربيع اللي على الخد فوّاح
محمد عبدالعزيز الخنيفر - أشيقر
غدير شوفه يأخذ العقل يا ناس
بين الجبال الصم محلا وصوفه
يا زين شوف الناس بالجال جلاس
كشته ترد الروح بالحيل محفوفه
بجواً ربيعي والهوا فيه نسناس
ترتاح نفسك .. والحياة مخلوفه
يا قلب ياللي للطواريق عسّاس
ابشر بشوفه والدروب معروفه
خالد ناصر المخيمر - روضة سدير
الماء تجمّع بين وديان وجبال
من مزنةٍ هلّت وماها هماليل
منظر رهيب يفرح النفس يا رجال
من حوله أشجار طوال ومضاليل
باسبابه الشلال بالمي هتال
يطربك في صوته مع الصبح والليل
علي الرشيد - رياض الخبراء
لو تقلّب الصوره تلاقي بها إبداع
إبداع للخالق .. وإبداع تصوير
في نظرة الفنّان تصوير ملتاع
وفي زوايه رؤية جمالٍ بتقدير
تشمل على كل التضاريس بأنواع
صوره رسمها الشِّعر من دون تحضير
سليمان عبدالعزيز السنيدي - الرياض
غيم السما وانعكاسه بين ضلعين
ما أروعه والذي صَوَّره للناس
يازين شوفه بعين او مشي رجلين
القلب يزداد ايمانٍ .. و أوناس
كنّه جليدٍ بفوجه بين الاثنين
وكل الذي حولها ضَمْيَا ويبَّاس
سعود عائش الحربي - جدة
سد الطبيعة ما بني فيه بنيان
ولا داجه البناي والاّ رقى به
مكانه اللي فيه غرّات الأمزان
دونه جبالٍ شاهقاتٍ مهابه
السيل راكد حايرٍ فيه غدران
إلى كشت ما فيه جواً يشابه
يا وين جوّه يا بكر ماله ألوان
قلّي ترى وصفه علينا تشابه
حمد عبدالله الوايلي - حوطة سدير
سالت بلاد الخير ثم عم الأديار
أفراح تلو أفراح من يوم جانا
والحمد لله ديارنا كلها أمطار
وراعي الحلال يقول لاواهنانا
شفنا السعاده بيّنه بكل الاعمار
الله عطاهم خير .. والجو زانا
واليوم نشوف أفراح في كل الأقطار
والشكر للمعبود .. منّا دُعانا
ريان محمد الخنيفر
يا زين شوف الوقر وسط الطبيعه
بين الجبال النايفه .. بين الأشجار
طبيعةٍ يا حلوها في ربيعه
ونبت العشب من بعد ماهلّت أمطار
سطام المسردي - الرياض
نرحب بمشاركاتكم الشعرية وما تلتقطه عدساتكم
من الصور الهادفة والطريفة على إيميل الخزامى:
rb-khozama@alriyadh.com
صورة العدد السابق