صوت الصورة

بستان يفتح نفس منهو كشت فيه
الماء والخضره وذكرى السنيني
بين النخل والأثل يحلى المشي فيه
وبيتٍ قديمٍ شوفه يسر عيني
تسلم يمين اللي شقى وأشتغل فيه
صوت المكينه يطربك بالرنيني
أهل الفلاحه شغلهم نفتخر فيه
قبل التطوّر كدهم باليديني
خالد ناصر المخيمر - روضة سدير
يا زين وقتٍ مضى يا ناس
يوم المزارع على الهوني
صبّاب يضرب ولا غطاس
والبركه اللي تشوفوني
أجدادنا ما بغوا حرّاس
ياما من الخير مدفوني
عبدالكريم عبدالرحمن السلّوم - القرائن
وقت المكينه والنخل والحياله
يوم القلوب الصافيه والنظيفه
والجو يا حلوه على كل حاله
بين البيوت وبين خيره وريفه
هي راس مال اللي يباري حلاله
يطلب معيشه ما يدور وظيفه
رزقه على اللي ما يخيب سؤاله
اللي يفك الضايقه .. والكليفه
حمد عبدالله الوايلي - حوطة سدير
وين انت ياللي تبي تسبح
تعبان والشغل هدك هد
هذا القرو ميته تطفح
بارد وجلدك يشده شد
في مزرعة شايبٍ ماكح
جو الطبيعه جعل له سد
يا كل ويشرب طعامه صح
من ناتج ارضه وبيده كد
عبدالكريم النغيمشي - لوذة
يا حلو شوف الزرع يا زين شوفه
عيشة الأجداد بسنينٍ قديمه
كم بها خيرات ماضيها معروفه
والمياه موفرة ماهي عديمه
من ملكها دايمٍ نفسه لهوفه
فضلها وافر بخيرات وغنيمه
والمزارع حبها صعبٍ وصوفه
في بلدنا يا عسى ربي يديمه
محمد عبدالعزيز الخنيفر - أشيقر
ياذا النخل وين الذي غارسك حيش
والبيت من طول الهجر أصبح أطلال
ومويه قليبٍ ببركةٍ للمعاطيش
يروون أهل الحي بسطول وسحال
ياما عنوا له من ضيوف ومطاريش
راع الفلاحه في الكرم خوش رجال
جواً عليل وخضره وصفوة العيش
مابه ازعاج للموبايل ولا إرسال
سعود عبدالعزيز الهزاع - نعام
ياما حلى ثلاث في وسط واحه
الميّ فيها والنخل زرع وخضار
يحلى بها المقعاد .. والإستراحه
وسجت الرجلين بتلى النهار
بقعةٍ للفكر فيها مساحه
وللقلب فيها متعةٍ وأيضا الانظار
وتلقى بها عن لجة المدن راحه
وعن البواري واكتظاظ العمار
سعود عائش الحربي - جدة
شوفوا المزارع والنخيل الجميله
والماء نماها نعمةٍ كلها خير
أرضٍ تسر القلب ما به مثيله
شوفوا مناظرها وزين المشاجير
وشوفوا النخيل اليوم ماكثر حصيله
فيها العذوق اللي نشوفه مزابير
ياما تفيدك له سنينٍ طويله
فضله عظيمٍ للجدود المخابير
ريان محمد الخنيفر
صورة العدد السابق