صوت الصورة

ليت المزارع يجني التمر بيديه
نسلم من الأجناب في كل الأعمال
اللي طلع بالكر ربي يعافيه
يعبي المطحن وينزله بحبال
مثل زمان اول وهذي مواريه
يوم السواني والبعارين له حال
علي رشيد الرشيد - رياض الخبراء
ما أحلى النخيل اللي له محبة وشوقه
ياما يذكرنا بالجدود الأصيلين
وكثرة علوقه يعجب اللي يذوقه
قاموا به رجالٍ على الطيب ساعين
ويا زين نخله مالياتٍ عذوقه
فيها الرطب من كل الأنواع والزين
محمد عبدالعزيز الخنيفر - أشيقر
ارق وتلمّس لا لفا سهيل بالليل
وأخرف لنا تمرٍ لذيذٍ مذاقه
وإليا خرفت فقرّب البن .. والهيل
واختر من الجزلة وكب الدقاقة
وأكرم رجالٍ همّها عدلت الميل
وجنّب عن اللي جيدٍ فالطفاقه
من جاد ساد وصار عمره تساهيل
واحذر تظن ان الكرم درب فاقه
أبو بكر عبدالعزيز الريس - الرياض
رجل على النخله و يقطف من عذوق
يجني محاصيله ويعرف زبونه
مدري متى يقضي و يلحق على السوق
سوق القصيم اللي بها يذكرونه
سعود سعد العتيبي – الرياض
خلّك حذِر للكَرْ لا ينقطعْبك
خطرن عليك إن طِحْت ياعود ماقِمت
لا نافعٍ نفسك .. ولا ينتفعْبك
غيْرك أوْ تمْرك لاجلبتِه ولا سِمْت
دوّر على اللي مِهْنته يرتفعْبك
للي تبي يرفعك لوْ داخلِه نِمْت
فهد عقيل الطويان - بريدة
أم الجرايد .. أم الخير
في آية الارض مذكوره
من الجوف ولا نخل سدير
ولا نخل راس تنوره
شجعان سعود المقاطي - الرياض
أخرف على هونك وهات المناصيف
واللي ملون اتركه في عذوّقه
رقيت بالمخرف وكرٍّ على الكيف
ماشٍ على الفلاح شيٍ يعوّقه
لا شفت عسبان النخل قلبي ارهيف
شوف النخل للقلب ياهي تشوقه
النخل طيّب من عذوقه إلى الليف
الله يجيب اللي صدوقً حقوقه
عثمان إبراهيم الرشيد - الرياض
عطني بحقّه مخرفٍ من المناصيف
من كف شايب يعتني بالفلاحه
قدوعها لي جيب مع دلة الكيف
رطبته تعالج من شكى من جراحه
يوم السعودي ممتهن باسق الليف
من الدبس يلصق به الطير بجناحه
سعود عبدالعزيز الهزاع - نعام
لا جا الرطب الكل يفرح وملهوف
غالي علينا والعرب بانتظاره
هذا النخل له محبة .. ومعروف
الكل يفرح به وينصى دياره
هذا غذاء أجدادنا وزاد الضيوف
وقتٍ مضى معروف هذا خياره
ريان محمد الخنيفر - أشيقر
اخرف وعبي لنا المخراف
يا ذيب جوعى نبي ناكل
الوقت ضيّق وشكلك طاف
من شفت شكلك والاستايل
طاقية جنيه تبي معطاف
مع كوت وعقال ياهايل
عبد الكريم النغيمشي - لوذة
يا باسقات الطلع يا زين الاثمار
ويازينها من بين خضر الجرايد
لابان نجم سهيل عند الأسحار
تلقى التمرو الخير عم الموايد
ويا عود لا تغريك قوات الاجبار
أحذر اتطيح وما تحصل فوايد
حمد عبدالله الوايلي - حوطة سدير
الخرف والتصريف والتشيف والكر
أعمالٍ حاضره في ذهن فلاح
ياما رقينا الباسقه في البرد والحر
ويا ما وضعنا بطلعها لقاح فواح
واليوم حل بنخْلنا القطع والهجر
وإن أثمر العُمَّال يجنون الأرباح
عبداللطيف الحُمَيَّانِي - عنيزة
شلت أنا المحْدرة فوق الكتف وابتديت
أصعد النخلة اللي به لذيذ التمر
امتمسك بكرٍّ شد جسمي ورقيت
بخرف التمر منها أسوده والحُمر
وأحلى الأيام لامني بغرسي اعتنيت
وبالمزارع سكنت وعشت باق العمر
صالح عبدالله التميمي - الرس
يا مرحبا يا مسهلاً فيك يا سهيل
أقبلت بالبشرى وحل البرادي
وراعي التمر فرحان فرحان بالحيل
تباشروا بالخير .. نادى المنادي
الله يعجّل ياهل النخل بالسيل
والله يديم الأمن برجاء بلادي
خالد ناصر المخيمر - روضة سدير
يا شجرة الخير يا زينه
فلاحنا اليوم تعباني
الله يقويه .. ويعينه
لو يمسك أطراف عسباني
يا حلوة التمّر يا لينه
ربي ذكرها بقرآني
عبدالكريم عبدالرحمن السلّوم – القرائن
نخيل الجزيرة سوى النخل نوّاره
بطلعة عناقيده فرح كل فلاح
أصلاً تمور الشرق وأغلاه وخياره
ويفطر به الصيام على الشكر وأفلاح
سعود عائش الحربي - جدة
صورة العدد السابق