صوت الصورة

عزّاه يا قصرٍ بنوه القديمين
بيتٍ جميل وزينوه بزخاريف
كم اسرةٍ عاشت ولوهم كثيرين
يسع لهم هم وضيوفهم والخواريف
يوم النفوس وساع والناس سهلين
ولباسهم عادي مكرر وقد شيف
فطورهم تمره وزبده مع لبين
وعشيّهم قرص ورقيق ومراهيف
عبدالكريم النغيمشي -لوذة
يا بيت ما باقي لنا غير ذكراك
والكل منّا يحِن دايم لماضيك
وسط النخل أسس شواميخ مبناك
لك قيمةٍ في ماضي الوقت نغليك
والنور مصدر سرج تنوّر لماطاك
وقت الشتاء طين الملابن تدفيك
والقيض بارد لي فتح باب شباك
ريح الندى وظل البواسق تكفيك
سعود عبدالعزيز الهزاع - نعام
ياما حلا منزل الطيني
شامخ وباقي على حلّه
بين النخل والبساتيني
لا شك راعيه ما ملّه
له ذكرياتٍ من سنيني
وقتٍ مضى بين ربعٍ لّه
سلطان أحمد العضيدان - الغاط
تراث ماضي مابقى كود الاطلال
لا واحسافه راح كله تهدّم
كل الشعوب لها حضاره وأمثال
قديمها واضح وحاضر تقدّم
دايم نقول ان السبب فيه اهمال
وقت المصيبه ما يفيد التندّم
حمد عبدالله الوايلي - حوطة سدير
يا حي بيت الطين في وقتنا اللي راح
يضم العوايل كلهم ما شكا من ضيم
مضى مع هله واليوم متقاعد ومرتاح
غدا مالخيال وليت يعمل له الترميم
على شان ذكره ما يروّح ولا ينزاح
وجيل العصر يعرف تراث أهله القديم
مبارك محمد الضعاوين - الرياض
راحت بيوت الطين راحوا أهاليها
راحت علينا شوفها يجلب أحزاني
لا واهني اللي على الطيب يحييها
واللي بنى داره رجالٍ وشجعاني
شوفوا بيوت أجدادنا الكل ناسيها
راحوا أهلها أصبح القلب حيراني
محمد عبدالعزيز الخنيفر - أشيقر
بيتٍ تراثي باقيٍ وسط الأطلال
جدد بناه اللي يحب الطبيعه
ياما حلا في شوفه نخيل وظلال
بين النخيل اليانعات الفظيعه
وياما حلا في وسطها شرب فنجال
مع تمرة خلاصٍ وجلسة بديعه
وبالليل سمره مع سواليف وأمثال
مدهال لأصحاب النفوس الرفيعه
خالد ناصر المخيمر - روضة سدير
بيوت الجدود اليوم راحوا وخلوها
ألا وين راح اللي يذكّر بالاجدادي
ألا يا رجال الطيب لابد تحيوها
نبي يشاهدها من الجيل وأحفادي
ألا للأسف طاحت ألا كيف تنسوها
ألا وين اهالي الخير ألا وين الأجوادي
لابد نبنيها ونسعد بذكراها
تراث يذكّرنا بها الحب يزدادي
ريان محمد الخنيفر - الرياض
خلوا بيوت الطين لا تهدموها
من شافها بالخير يدعي لهلها
منازل الأموات لا تدمروها
تلقون بالأرض الوسيعة بدلها
الأرض فيها متسع تسكنوها
ما ظاقة الأرض الفسيحه بأهلها
أمواتكم بتراثها تذكروها
وليا أختفت نسيت وكلٍ جلها
بدر الحزيمي
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
أو الفاكس رقم: 0114871070
ويا هلا..
صورة العدد السابق