يزهى جمال البر لا أقبل ربيعه نسايمٍ .. وأطياب زادت حلاته

يا زين لون الشفر زيناه
لوهو قديم المديلات
الله من مرةٍ سقناه
يوم المواتر قليلات
السيل بين الشجر شفناه
عقبه ربيعٍ .. وكشتات
عبدالكريم عبد الرحمن السلوم - القرائن
فات المديل وراح مع عصر الأجداد
نوعه شفر واللون أحمر بتحديد
بالروضة الخضرا معه كامل الزاد
بالبر خلوها كما فرحة العيد
اختر خويك من صناديد الاجواد
اللي لهم مع درب الأخيار ترديد
علي الرشيد - رياض الخبراء
الهاف والله يا جماعه تقاعد
من عقب ما هو كان عنتر زمانه
ياما مضى له دور واليوم قاعد
قاعد عن المشوار وخلى التكانه
صبه خواجه صب وايضا المقاعد
مريح مخمل طارته خيزرانه
ياما ركبته في نزول وتصاعد
من طعس في عثمور متعدي اخوانه
خليف فهيد الحربي - الرياض
للناس في عشق الطبيعه مواويل
كلٍّ لها يشتاق وِيْشِدِّ رَحله
تشرح صدورٍ ضيقتها البهاذيل
يا زينها لا وافقت وقت عطله
العشب والخضره وِضَوّ وْمعاميل
والغيث يِحيي الناس لاهَلِّ وبله
فيها الأناسه مَعْ قروم الرجاجيل
اللي لهم في طيِّب العلم صَمْله
يالله عسى بْلادي غيومٍ مظاليل
منها المطر بالأرض يلتم شمله
ناصر جمعان آل عوض - وادي الدواسر
يا محمد السويح عسى الرب ياقاك
أتحفتنا بالصوره اللي جميله
وياذا الغدير اللي لك النفس تهواك
نكشت على جالك نسوي العبيله
شكلك ينعوش والمكاشيت تنصاك
والراعي يروي منك يملا صميله
في وسط قاع يهتني فيه ممشاك
وصوت أم سالم ما تدوّر بديله
خالد ناصر المخيمر - روضة سدير
يزهى جمال البر لا أقبل ربيعه
نسايمٍ .. وأطياب زادت حلاته
والمي والخضره حلاة الطبيعه
وفرتٍ لمن يهوى المطارش مناته
وليا بسطت الفرش جال الشريعه
قل يا حمد خِرْجْ المعاميل هاته
ريف العمر ممشاه وسط الطبيعه
وقتٍ مضى عيش البساطه صفاته
وسج القدم لا ضقت برضٍ وسيعه
وأحمد كريمٍ أمننا من هباته
سعود عائش الحربي - جدة
تاريخ ذا الموتر والشجر معمر زين
ما وصخوه اهل المكاشيت بجلود
والسيل مزن منظره يبهج العين
من طيحته متعانق بصافي نفود
طبيعة لي حدود عام الثمانين
تريّح فؤاد اللي من الهم مضهود
بقل المواتر والاوادم شف الزين
الارض خضرا ما تهشم بها العود
سعود عبدالعزيز الهزاع - نعام
اعجز اوصف طلعتي خص بالسيل
الكل يفرح دايمٍ في نزوله
وحولك ربوعك من قروم الرجاجيل
يا طيبهم طيباه عز ورجوله
في مجلسٍ ما فيه قالٍ ولا قيل
والسيل يجري يسعدك في هطوله
مع شبة النيران وصفة معاميل
مجهزة للضيف ساعة وصوله
محمد عبدالعزيز الخنيفر - أشيقر
يا راعي الفرد الحمر وش مديله
مدري من الخمسين والا وراها
جنبك شعيب وبادي فيه سيله
في اول الوسمي وبرقه سراها
علّه من مزون السحاب المخيله
لين ارتوت بالخير وانبت ثراها
منظر طبيعه فيه ذكرى جميله
يجلي عن العين الشقيه كراها
حمد عبدالله الوايلي - حوطة سدير
يا رب ترزقنا من السيل هتّان
يروي الحزوم وتمشي الشعب للجال
الارض عطشا تنطر الرب رحمن
ينزل عليها رحمته.. والوسم مال
ادعوا معي يا خوان.. لحوا بالالحان
يا رب تمطرنا لما الارض تختال
عبدالكريم النغيمشي - لوذة
يطيب جوي لا قبل السيل جاري
والطلح حولك مع سيولٍ حواليه
وياما حلا جلسة بوسط البراري
ويا زينها لاربعت كل أراضيه
وحولك ربوعك من يمين ويساري
وارضٍ تسر القلب والسيل غاطيه
والكل يفرح خص حول الخباري
وموتر قديم ما حد اليوم ناسيه
ريان محمد الخنيفر
يا زين منظر شعيبٍ فيه ظل وغدير
يا ليت منهو على جاله يسوي غداه
واشم ريح الخزامى عقب يومٍ مطير
في ديرةٍ جعل ما تاطا حصاها العداه
يا الله بتالي الوسم نسمع رعود وهدير
غيثٍ على الراس يمشي كل وادي وطاه
لطيفة محمد المطرب
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
ويا هلا..
صورة العدد السابق