صوت الصورة

هذا الشفر مديل سبعة وخمسين
بدوله خليجيه بجنب الوزاره
إجره يشيل الناس قبل اللمُزين
احدٍ يراجع .. واحد يبني عماره
سيارتين بشارعٍ عرض ستين
وقتٍ مضى ما يرغبون الحضاره
أحمد السمحان - الزلفي
الله يا ذاك الزمان الجميلي
اربع عقودٍ روّحت للورى خلاف
العارض اللي بالشوارع تهيلي
عن القرى تفرق كثيرٍ والأرياف
صورة وتثبت يا بشر بالدليلي
ان المواتر وزنها ماهي خفاف
عبدالكريم بن خزيم - البكيرية
هذا التقاطع قبل شغل الاشاره
وفروت يركبها صناديد وقروم
العسكري واقف عليه الخفاره
تنظيم مع عسّة على كامل اليوم
وعلى يسارك شامخات العماره
أبدع مقاولها فلا يلحقه لوم
مع أمنها عمت بلادي الحضاره
ومن شانها جعله على الدوم مضيوم
ابو بكر عبدالعزيز الريس - الرياض
هذي مواتر من مديلات قدام
مرّت عليهن يا ملا عدّة سنين
نشوفهن دايم على عرض الافلام
والا الى جينا على الدرب ماشين
يوم انتذكر وقتنا ذيك الأيام
الى ركبناهن وحنا سعيدين
علي الرشيد - رياض الخبراء
صور من الماضي لها عدة أعوام
شوفوا المواتر والعماير قديمه
شوارعٍ يا زينها ذيك الأيام
من دون ساهر والغرامة عديمه
الناس في راحة ولا فيه إزحام
حياتهم والله ياهي كريمه
محمد عبدالعزيز الخنيفر - أشيقر
الأصالة والمتانة وقلّ العطال
تجربه موثَّقه في موترقديم
في المعارض دايمٍ عنه سؤال
كم سعر هذا .. وهذا بكم سيم
تحفةٍ نادره ما يغيرها مآل
رغم الحداثة عشقها يبقى مقيم
عبداللطيف الحُمَيَّانِي - عنيزة
الشارع اللي راح وقته وولا
فيه المواتر قبل عام ستين
واللي ذكر وقته ترى مايملا
يشوقه المنظر ويذكر العين
بالماضي اللي ما نسيناه كلا
والحمدلله عهدنا اليوم عهدين
عهدالرخا والخير واللي تبلا
الله يضده يا مسلمين امين
حمد عبدالله اليوايلي - حوطة سدير
والله ما ندري وش الغيب بيجيب
تحت الولي والرحمة الله انترجا
خلك مع الخالق قوي المقاضيب
في حزّت الشدّه بظله تلجا
لوشفت نفسك فوق عال المراقيب
لابد للمحوال رجلك تسجا
أصبر على موترك وأرض المكاتيب
ولابه غرابه كان شفته يرجا
غنام مسعود القريني - نعام
في ما مضى شوفوا المواتر قديمات
وعمارةٍ أيضا قديمة لها سنين
هذي التكاسي عندنا بماضيٍ فات
موديلها من فوق واحد وخمسين
وفي دارنا ما له وجود وعديمات
ولاسلافنا هم حضّروها وساعين
ريان محمد الخنيفر - الرياض
السايق اللي زمانه جاه
يوم الدهر حط بركابه
موتر قديمٍ وهو يبغاه
يعرف وش اللي فتح بابه
لو ترحمونه بجيبٍ آه
موديل خمسه تهنى به
عبرالكريم النغيمشي - لوذه
ذكرياتٍ قديمة حرّكت بي الخيال
رجعتني لماضٍ والله المستعان
المواتر لها هيبة .. وفيها جمال
من ركب موتر الخمسين زان الزمان
والعماير بدأت تعمر يمين وشمال
والتطور بدأ ينهض وخير وأمان
عثمان إبراهيم الرشيد - الرياض
حسب المواتر ذا الصور عام تسعين
هجري وزوّد خمسة اعوام قدام
بنشئة مباني مسلحه بفسح عشرين
شقه وموقعها على الشارع العام
خص المدينه ومنطقة منبع الدين
يسكن بها الزوار ومن يلبس حرام
سعود عبدالعزيز الهزاع - نعام
الله يرحم يا هلي ذيك الأوقات
راحت ولا باقي سوى الذكرياتي
تبدّلت يا ناس واليوم كشخات
مفتاح بصمة وداخلٍ مخملاتي
خالد ناصر المخيمر - روضة سدير
يا زين صورة التكسي
موديل سبعة وخمسيني
هذي مواتر الأمسي
راحت عليها أيام واسنيني
واليوم نركب على الجمسي
ما اغبط راع الملاييني
عبدالكريم عبدالرحمن السلوم - القرائن
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
أو الفاكس رقم: 0114871070
صورة العدد السابق