صوت الصورة

الروضه اللي من وراها نفودي
والشجره اللي وسطها شكلها غير
وفي جالها منظر لجمع الحشودي
ناسٍ تنزّه فيهم كبير .. وصغير
مليانةٍ من فضل مجري الرعودي
يسوقه المعبود وآل المقادرير
على الديار المملحله .. والسدودي
وعقبه نشوف العشب جاله نواوير
سعود مطرب العتيبي - الدوادمي
الوسم ودّع وجانا السيل
صورك يا سعود مليانه
من شافها ينبسط بالحيل
ياخذ عياله وورعانه
يا الله على البر قبل الليل
الناس في البر فرحانه
السيل يجري يزين السيل
وسدره بوسطه وريّانه
عبد العزيز الصالح - القصب
الأرض ممطوره .. وجوٍّ خيالي
والسيل يجري كنه النيل في مصر
والرمل أصبح مثل فرش الزوالي
والعشب قبقب وانتشر زاهي الزهر
ياما حلا الطَّلْعات مَعْ كلِّ غالي
في مثل هذا الجو لو يوم في العمر
ننسى الهموم وينشرح كلِّ بالي
ما ضاقت الدنيا إذا استأنس الصدر
ناصر جمعان آل عوض - وادي الدواسر
السيل نفرح به إذا حل طاريه
وكل العرب تفرح بشوفه سعيده
والناس لاجا في قدومه تحييه
وكلٍ يحبّه جعل ربي يزيده
ونشوف بعد ايام روضٍ باراضيه
وكلٍ يجي له من بلادٍ بعيده
محمد عبدالعزيز الخنيفر - أشيقر
عسى السحاب اللي نشا عصر من غرب
خيّل من العارض لمقلع طميّه
عسى هماليله تسيل جفن ضب
وأرض الفويسه تسيل الخروعيّه
وروض القطا من نازل المزن يشرب
واد الرمّه وبحار والحرمليّه
بدر الحزيمي
رسمٍ لسدره بوسط السيل
شوفه جميلٍ مع أزهاره
والنّار تحلى بوقت الليل
أرض الوطن هلّت أمطاره
سعود عائش الحربي - القاهرة
سالت بلادي وارتوت كل اراضيه
الحمد للمعبود ساعة نزوله
الخير جانا جعل ربي يحييه
يا مرحبا بالسيل لاجا حلوله
ابعد عن الوديان ياما الخطر فيه
السيل لا جاها سريعٍ وصوله
ريان محمد الخنيفر - الرياض
يا زين مكشاتٍ بجال النفودي
والسيل حوله واصلٍ من مسيله
مثل البحر والناس حوله حشودي
يا طيب نسماته تراها عليله
الله كريم وخير ربي يجودي
وتصبح صحارينا رياضٍ ضليله
عثمان ابراهيم الرشيد - الرياض
الناس تفرح بريح السيل
لا قالوا اليوم سالوا ناس
تذهب ويمّه ولو بالليل
تسرع شفوقه بليا ياس
يا رب ترحم وزدنا كيل
من رحمتك سايق النسناس
خل الخباري تشد الحيل
زودٍ على الفقع به بسباس
عبدالكريم النغيمشي - لوذة
يا سعود يا زين الفياض المسيله
لا حار ماها ثم تساوى على الجال
جال النفود اللي وطته المخيله
وياللي هويتوا طلعة البر .. والفال
حذرا تجون السيل .. حذرا مغيله
ثم تبدل كل الاحوال .. والحال
حمد عبدالله الوايلي - حوطة سدير
المنظر اللي يغري الناس بالحيل
منظر طبيعي والعرب ينزلونه
ومزيّنه طعسٍ محيطٍ به السيل
والطلحه اللي بالوسط لا تجونه
عبدالمحسن المحيسن - رياض الخبراء
على الخزامى منظرٍ جابه سعود
غدير صافي زين شكل الطبيعه
منهل سحاب سابقه لجة رعود
على البراري والفياض الوسيعه
حايط به الكثبان متكون نفود
كنّه ذهب في ام العيون الوسيعه
سعود عبدالعزيز الهزاع - نعام
الناس تفرح بشوف السيل
الكل صفّوا على جاله
سعة الصّدر زينةٍ بالحيل
الكل يجلس مع عياله
عبدالكريم عبدالرحمن السلّوم - القرائن
من عقب ما هلّت هماليل الأمطار
أمطار مزنٍ ارتكم بالسما ذاب
وأصبح غدير البر يندر بالاقطار
سلاب للألباب .. خلاب .. جذّاب
يا جالسٍ جنبه تنبّه للأخطار
الغرق ما يثنيه فاسٍ .. ومشذاب
محمد إبراهيم الفهيد - الزلفي
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
أو الفاكس رقم: 0114871070
صورة العدد السابق