صوت الصورة

بيتٍ مفصّل بالمقاسات مطلوب
يا زين منظرهم بوسط البراري
بيت الشعر في البر لا صار منصوب
يرتاح بالك مع صديقٍ مباري
رمز الكرم والطيب والضيف محسوب
تاريخنا معروف والكل داري
عثمان الرشيد - الرياض
البر متعه لكل الناس
والكل منهم نصب خيمه
الكشته اللي تزيل الباس
مع ربعك اللي لهم قيمه
والنذل ماله معي مجلاس
ما فيه فودٍ .. ولا شيمه
عبدالكريم عبدالرحمن السلّوم - القرائن
صورة العدد السابق
جانا الربيع اللي به الكل مسرور
ثم ابتدا العربان يمّه يسيرون
كل الوطن عمّه والخير موفور
سبحان ربٍ نزّله خالق الكون
وصارت أراضينا بها ورود وزهور
وفي كل موقع كم به الناس يجنون
محمد عبد العزيز الخنيفر
تولعوا بالبر من صغر الأعمار
ثم كشتوا يم النفود القريبه
حطوا شراعٍ ما يجي طوله أشبار
تفضلوا يا هل الكرم والوجيبه
هذي سلوم رجال لو كانوا صغار
الدلّه الصفرا ومعها رطيبه
حمد عبدالله الوايلي - حوطة سدير
ياللي بذا الخيمة لكم ذكرياتي
أطفال عند النار تصالي المعاميل
في ما عتقد لهم قريبٍ بياتي
معهم قدوع مجهزين الفناجيل
والخوف من ناسٍ تجي مسرعاتي
بجيوب تزعج من يحب التعاليل
سعود عبدالعزيز الهزاع - نعام
الدار سالت وعمّ السيل
بديارنا زين منزاله
نعمه تبي الشكر والتهليل
لا واهني اليوم من جاله
وشفنا العرب بين حط وشيل
لأرض الكلا دوم حلاّله
ريان محمد الخنيفر
يحليلهم في شكلهم يخزي العين
والكل منهم كاسبٍ الرجوله
في وسط خيمه جالبين المواعين
متعلمين الطبخ منذُ الطفوله
واللي نصاهم يبشر بقولة أهلين
متوارثين الطيب عرضه وطوله
خالد ناصر المخيمر – روضة سدير
بيت الشعر يا حظ منهو جلس فيّه
رمز الأصاله والكرم رمز الابطال
اللي يعرفه حق ما هو مخليّه
كبار كانوا بالعمر أو هم أطفال
بشائر القحطاني - الرياض
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 0114871070
ونرحب بمشاركاتكم الشعرية وما تلتقطه
عدساتكم من الصور الهادفة والطريفة ..