ياللي تبي المصياف والحر حاديك .. المملكة فيها المصايف عجيبه

كتب بيت الأسبوع الماضي الشاعر صالح البشري من القصيم والذي يقول:
ياللي تبي المصياف والحر حاديك
المملكة فيها المصايف عجيبه
وكان صدى الشعراء جميلا وكما عودونا الإبداع:
إن رحت للطائف بها الجو يرضيك،
أو رحت إلى أبها والديار القريبة..
تلقى بها جوٍّ يسرّك وينسيك،
حرٍّ يجينا في الشهور العصيبة..
ترى الوطن، واسأل هل العِرف تنبيك،
آمن منِ ديارٍ بعادٍ غريبة..
محمد مقحم المقحم - الرياض.
أبها البهيه يا المصيف تناديك
والطايف المانوس برضه قريبه
والباحه الغنا بها جو يغنيك
عن ديرةٍ فيها العوايد غريبه
والحمد لله كُل شيٍ باراضيك
ومن البلد ماجود بيدي نجيبه
محمد عبدالله الشهري - مكة المكرمة
ترى السياحه في بلدنا تناديك
كل المدن حولك تراها قريبه
في الطايره وإلا مع البر يمديك
في جبالها تلقى مناظر عجيبه
حتى ليالي نجد لا بد تعطيك
بين النخيل وزرعها تنتشي به
سليمان بن عبدالعزيز السنيدي - الرياض
القيض لا مسَّك وبحلت هقاويك
بِه في وطنك اجمل مصايف قريبه
السوده أو أبها البهيه تناديك
وما حولها أرض وناسٍ حبيبه
سعود عائش الحربي - جده
ترى الوطن حدد هدفك ومباديك
وفيه الأماكن والديار الحبيبه
يم الجنوب يرحب بجوه يناديك
واهله كرام والمسافه قريبه
وما فيهم اللي في مكانه يعاديك
والى حداك الصيف وأموره صعيبه
شد الرحال والناس واجد تلاديك
حمد عبدالله الوايلي - حوطة سدير
القيظ حط رحال جوه با أراضيك
وسموم حره ما هي عنا غريبه
يا باغي الخارج عسى ربي يهديك
بعيد عن ربعك بديار صعيبه
ترى المصايف مع هواها تناديك
أمن وأمان في بلدنا الحبيبه
صالح بن إبراهيم السنيدي - الحريق (الوشم)
بيت الأسبوع
كتبه الشاعر خالد البيضاني من القصيم ويقول:
اللي يهمه كلامي يسمع الاقتراح
ننشي وزارة نسميها حقوق الصديق
نستقبل صدى البيت المطروح خلال ثلاثة أيام من نشر البيت المطروح على إيميل الصفحة:
rb-khozama@alriyadh.com