ها العام تمّ الحج باليسر ورفوق بأسباب هالتصريح جتنا التفاريح

كتب بيت الأسبوع الماضي الشاعر عبدالكريم
بن خزيم من البكيرية والذي يقول:
ياللي رجيتوا بالسماء واحد فوق
بالله كيف الحج مع أمر تصريح
وكان صدى البيت من الشعراء:
القصد ما هو منْعكم يا هل الشوق
للبيت والكعبة ونيل المرابيح
القصد تنظيمٍ يجنّبكم العوق
بين المشاعر يا الوجيه المفاليح
ها العام تمّ الحج باليسر ورفوق
بأسباب هالتصريح جتنا التفاريح
محمد مقحم المقحم - الرياض.
يوم الركايب كانت الخيل والنوق
وإلا مشي بالرجل مع هبة الريح
ذاك الزمان الحج متعب وهو عوق
وأرض المشاعر واسعه دون تفسيح
والحين زاد أعدادهم طاق مطبوق
يلزم تنظيم معلن وتوضيح
ولي الأمر حاكم وله حقوق
شف النتايج يوم بالأمر تصريح
صالح بن إبراهيم السنيدي - الوشم
شف كيف صار الحج بالاذن مرفوق
هذي نجاحاته إذا فيه تصريح
تحج في أمان مبعد عن العوق
مثلك مثل غيرك بنهجٍ صحيح
والتزامك بالنظم خلقٍ او ذوق
وتساهم ابنهجك بحجٍ به مريح
سعود عائش الحربي- جدة
نتايج النظام لاجاكم العوق
الحج تم بدون خلاف وتجريح
وتصريح ماشي على كل مخلوق
وتستخرجه وانته مكانك ومريح
نخدم حجيجه ولا نرجي السوق
وخدام بيت الله نبي أجر وتفريح
حمد عبدالله الوايلي - حوطة سدير
بيت الأسبوع
كتب بيت الأسبوع القادم الشاعر صالح البشري من القصيم ويقول:
ياللي تبي المصياف والحر حاديك
المملكة فيها المصايف عجيبة
نستقبل صدى البيت المطروح خلال ثلاث ايام من نشر البيت المطروح على إيميل الصفحة:
rb-khozama@alriyadh.com