بيت وصدى

كان بيت الأسبوع الماضي حول مقترح الاخ محمد بن صالح العريني عن غلاء اسعار الخضروات والفواكه بشكل لا يستطيع البعض شراؤها للشاعر حمد عبدالله الوايلي من حوطة سدير والذي يقول:
سوق الخضار اسعاره مولعة فوق
غطت على اسعار الذهب ياجماعه
وكان صدى البيت من الشعراء:
من الجشع زاد الطمع عند فاروق
ياخذ دبل ما يشتري في بضاعة
همه يزوّد مكسبه لحتمى السوق
يوم أكثر التجار ما به قناعة
حتى الرقابة مالها دور مرموق
تغيب سبع أعوام وتبين ساعة
مناحي محمد آل غيث
وصل الطماط اسعار مايقبله ذوق
نام الرقيب او قاسموه البضاعه
واللي يتكلم ليه ياناس محقوق
ماحد سمع له لو يصيح بجزاعه
واليوم يالمسؤول شف وافتح الموق
وترى المواطن والله انه وداعه
سالم صالح السالم /حايل
كان الرقابة غايبه عن هل السوق
ما يحدد أسعاره كود اللكاعه
نا س تلاعب بالسعر تحسبه ذوق
طماعة ما تعترف بالقناعة
سعر السلع طاير..ولا يعوقه عوق
حيل الله أقوى بس سمع وطاعة
عبدالرحمن بن أحمد الكنهل - الرياض
البارحه شريتلي كم صندوق
طماطم وبطاطه من البضاعه
قال السعر ثلاث مائه ومن فوق
الله واكبر ذا الغلا يا جماعه
وين الرقابه ليه هو مالنا حقوق
يضحك علينا كل صاحب طماعه
حميد خلف العوادي العنزي
تدمع عيونك لا تمشيت بالسوق
بأسباب سعر مرتفع للبضاعه
لو التجارة تضبط الناس بوثوق
وتقرر الأسعار مع كل باعه
كان المواطن يطمئن منه ويروق
هذا العمل ويشكره بالإذاعة
علي رشيد الرشيد - رياض الخبراء
السوق ولع نار والطاق مطبوق
ماعاد به رحمه ولامن شفاعة
ولامن رقابه تردع اللي بهم عوق
حبله على الغارب وطفف بصاعه
وماحدن يلوم التاجر بسرق وسروق
لاصار واثق ماتجيه الجماعة
ماجد رجا العادي /الرياض
شيّ يهول والسعر غير مطيوق
ولا أحدن يردّ الصوت حول ارتفاعه
في كل يوم واضح الطاق مطقوق
ونحتاج حل(ن) وننتظر باستماعه
الكل ما له نفس لا راح للسوق
لا من رقابه بيّنن في ضياعه
محمد عبدالعزيز الخنيفر/أشيقر
يا أهل الفكر والحل لا جاكم العوق
والحل مطلوب(ن) من رجال الشجاعة
ترى المواطن قلبه اليوم محروق
من هالتلاعب كل وقت(ن) وساعة
سعر(ن) شديد(ن) للمواطن ولا يلوق
نبي الحزم يا ناس وأيضا البراعة
ريان محمد الخنيفر /الرياض
بيت الأسبوع
حول مقترح الاخ محمد بن عبدالله السماعيل من الرياض عن النظر في مدة التقاعد والامل في تخفيضها وفتح المجال للشباب الجديد لأخذ نصيبه من خدمة الوطن ارسل الشاعر حامد الغالي من الجوف هذا البيت:
كان اربعين العام مانقصوها
عبنا وشابت رووسنا بالوظيفه
نستقبل صدى هذا البيت بثلاثة أبيات فقط تدور حول هذا الموضوع
ويفضل الإرسال عبر الإيميل:
rb-khozama@alriyadh.com
أو على الفاكس (4871070/ 011)
مقترح لموضوع بيت الأسبوع المقبل:
ارسل للصفحة الأخ حمود الزغيبي من الرياض مقترحا لموضوع بيت الاسبوع القادم وهو من يحمي المعلم من اعتداء الطلاب.