انتي تميزتي عن الغيد بالزين وابوك لقب بالكرم طير شلوى

كتبه للصفحة الشاعر فرحان الظفيري من حائل ويقول:
انتي تميزتي عن الغيد بالزين
وابوك لقب بالكرم طير شلوى
والصدى من الشعراء رائع جداً ويشكرون على هذا الإبداع:
هنيّ من صرتي نصيبه على الدِّين
صِرتي له بْها الوقت فرحةْ وسلوى
ما ايطالع لغيرك ولا تْلدّ له عين
والبِيض لاغرائه معك ما تهقوى
أنا اشهد انك له متاعٍ إلى حين
كنّه يقرّض شهْد واقراص حلوى
محمد مقحم المقحم - الرياض
يامنتهى الابداع بين المزايين
شوفتك عيد وهرجك أقّطعّ حلوى
في وجهك الملايكي بهجة العين
ووجودك بْجنبي عن الناس سلوى
يالماسةٍ ذلّت رؤوس الملايين
المال لك يااغلى من الروح يلوى
من يمتلك مثلك بدنياه والدين
فاز وعلى عرش السعاده تعلوى
حبك تصدّر بي جميع العناوين
مجنون فيك وأوّل الحب بلوى
عوض بن سلامه العنزي - الرياض
بيتٍ لفرحان الظفيري جزى العين
بالشوق للمزيون.. والعشق بلوى
"أنتي تميزتي عن الغيد بالزين
وأبوك لقّب بالكرم طير شلوى"
"محسن" مَ تاب عْن الهوى وْلوعة البين
لو تبتي عْن الزَّرق يا رماح علوى
وطبع الهوى متخالطٍ زين مع شين
ما هو بدايم للمحبين: حلوى
وغير الغضي ما اشتقت لو رحت انا وين..
من حدّ جدة لين طُرّاف سلوى
فيصل الصاعدي - المدينة المنورة
اشهر لَقب للبيض بنت الكريمين
شلوى بهذا الاسم بالعز ترّوى
من طنب شمر محتمين المخلين
واخوانها لها عن الظيم سلوى
ثلاثة الاخوان ماهم ردييّن
حامينها عن كل مضهود بلوى
ومن سألها عن سيرها وين تمشين
ردة عليه وقالت لطيور شلوى
مشعل بن صنت العصيمي - الخرج
ياراجحة بالعقل والملح والدين
وانا على فرقاك يازين مقوى
انتي هوى بالي ياكامل الزين
مع الحسن بك حشمة وكل تقوى
صالح البشري - الفويلق
مثل القمر ياصاحبي با السما زين
مر و ر نا من حيكم فيه سلو ى
تعجبني الوجنات والرمش والعين
ز ي الشهد في منحله فيه حِلوى
انت الذهب والماس وسط الموازين
من بيت عالي فيه دينٍ و تقوى
ودي نزور البيت وين العنا وين
قلبي على بعدك و لاعاد يقوى
محمد عبدالله الشهري - مكة المكرمة
يبقى محلّك داخل الروح والعين
لوكنت انا من بعد غبتي ف بلوى
حبّك بوسط القلب متربّع سنين
معقول عني ياحبيبي تسلوى
شفني أسافر من بعَدْكم الى وين!
ذقت المراره مابعد ذقت حلوى
عبدالكريم بن خزيّم - البكيرية
ياحي زينك وياحي هالعين
والي تولع اشهد الحب بلوى
يعيش عمره منول وهالحين
حزنه صعيب ولافيه سلوى
واشهد وغيري ناس دارين
الدرب طايل ولافيه ملوى
حمد عبدالله الوايلي - حوطة سدير
يا حلو من تجمع تميزها بالزين
وزادت بصيت ابوها طيرك يا شلوى
هذي تستاهل المهر لو هو بالدين
تغنيك عن زين البنات هي لك سلوى
زين(ن) يغطي عن عيونك بين البين
يبعد عن عينك كل شر(ن) وبلوى
لا شفتها ماودك ترمش لها بعين
فيها بياض(ن) ناعم(ن) مثل مروى
صالح إبراهيم السنيدي - الحريّق
بيت الأسبوع
كتب بيت الأسبوع المقبل الشاعر عبدالكريم بن خزيم من البكيرية ويقول:
ياللي رجيتوا بالسماء واحد ٍ فوق
لا لا تجون الحج من دون تصريح
نستقبل صدى البيت المطروح
خلال ثلاثة أيام من نشر البيت المطروح
على إيميل الصفحة:
rb-khozama@alriyadh.com