اللغز

كان لغز الأسبوع الماضي من طرح الشاعر عقاب بن سقيان العتيبي من الجمش الذي يقول:
أنشدك عن بيت هله ساس هدمه
يبقى بخير ليا بقى غير مسكون
وليا ردم يمكن صلاحه بردمه
ويجوز للحاكم يشيله عن الكون
وكانت حلول الشعراء:
يا زين طرق اللغز ياقو نظمه
اقولها واللغز مليان ميون
الضرس لامن عاب ملزوم هدمه
ما تطول الحشوه مع اللي يحشون
محمد أبو دحيم - البدائع
البيت غالي يبغي اللي يخدمه
يحتاج له وقفه وفرشه ومعجون
حافظ عليه ولا يعرض لكدمه
الضرس حل اللغز ما عندي ظنون
علي رشيد الرشيد - رياض الخبراء
أسنان الآدمي بالفم دايم تخدمه
من دونها تلقاه للحيل محزون
إلى بدت بنزولها زاد همه
يا زينها بالفم وانتم تعرفون
محمد بن عبدالعزيز الخنيفر - أشيقر
يا عقاب لغزك وافين ما نذمه
والحل بالاسنان والسوس ملعون
واليا سكن فالضرس يا كبر همه
ما ينفع اللا شيلته كان تدرون
رائد بن مناحي بن مسعد - القرين
لغزاً عيونه رائعات تخدمه
لانه على المعنى وتركيب مضمون
والحل ضرس فيه سوسه تعدمه
نظفه بالمعجون ويصير مصيون
مقرن بن متعب الهرف - الرياض
يعقاب جود الحبك للغز خدمه
وبيت تبي مفرود من جمعة سنون
السن من سوسه عسى ما نعدمه
وان طاح سنك لا تبسم لمزيون
فهد بن عقيل الطويان - بريدة
عقاب العتيبي جعلنا ما نعدمه
ارسل لنا لغز على قاف موزون
والسوس وسط الضرس يوجعك سقمة
بعض الاوادم لا اوجع الضرس يبكون
سعد مويزر مشعان البدراني - الرس
الضرس غالي جعلنا ما نعدمه
ودواه واضح بين فرشه ومعجون
وان اعتنينا فيه لازم نحشمه
ويبقى لنا طول الدهر در مكنون
سعود محمد البيضاني الحربي - الرياض
اللغز كل واحد يهمه
ودي احل مثل ناس يحلون
البيت ضرس ان جاه سوسه تهدمه
ما تنفع الحشوه ولو قيل مضمون
عبدالله عبدالرحمن العجلان - البكيرية
عقاب لغزه يا هل العرف حكمه
واللي قروا مهما قروا ما يملون
وإذا الالم يا عقاب يزداد سقمه
الضرس له يا عقاب ناس يشيلون
هادي عوض الحربي - قبة
لاسنان تخدم كل مخلوق خدمه
ون سوست يا عقاب تمحا على الهون
جمعان بن حشر بن قويد - من وادي الدواسر
جيت الطبيب وقال تحتاج خدمه
قلت السنون القشر عندي يلجون
من السوس عندي نص الاسنان عدمه
دايم نسمكرهم عساهم يزنون
سعد صنهات السهلي - الدرعية
لغز الأسبوع
كتبه للصفحة الشاعر محمد صالح الأطرش من رياض الخبراء ويقول:
انشدك عن بنت تثير النقاشي
صارت سبب للمشكله بين الاثنين
والبنت في موقع جديد وناشي
لقو لها حل بالانصاف راضين
نستقبل الحلول على الفاكس «4871070» أو الايميل rb-khozama@alriyadh.com
كما يسرنا المشاركة في طرح الألغاز الجيدة.