والله ما ادري من نعايد من الناس ثلاثة ارباع العلاقات فاضي

كان بيت الأسبوع الماضي الشاعر ذيب العمودي والذي يقول:
والله ما ادري من نعايد من الناس
ثلاثة ارباع العلاقات فاضي
وكان الصدى من الشعراء رائعاً:
حل المجال وهب للكيف نسناس
اعلنت للشعر الفريد انتفاضي
قبست من شعر العمودي بمقباس
جواهر في حندس الليل تاضي
اوافقك بالراي والراي له ساس
الفرق واضح بين حاضر وماضي
عبدالله المفضلي - الرياض
إن جيت لك رجل ٍ به الطيب لاباس
في شوفتك مبسوط يسعد وراضي
وإن جيت لك عود ٍ من الربع حسّاس
أصبح يلومك قال مالك أراضي !!
ماهو براضي دوم أبدا ً مع الناس
ولايعرف بيوم معنى التغاضي
عبدالكريم بن خزيّم - البكيرية
متخالطه يا ذيب من كل الأرماس
لكن على ماقيل خلك رياضي
تطوش ناس، وناس لا حقهم الحاس
يا بو وليد ارفع شعار التراضي
وعليك باللي قربته كله أوناس
اللي مثل شرواك جمل وعاضي
عبدالعزيز الصقيّري - حايل
رسايلٍ ترسل ونسمع لها اجراس،
ضياع وقت وْصايرٍ بالتراضي.
هرجٍ على غير النشامى به افلاس،
بيتٍ قديم وْلا عليه اعتراضي.
ودّك إلى أن الرجل خيّر به احساس،
يصبح لربعه حاتم الافتراضي.
يصير لاحوال الاصاحيب عسّاس،
وإن شاف خِله جاب كل المقاضي.
محمد مقحم المقحم - الرياض.
ترى المعايد فرصة(ن) بين هالناس
هو موسم(ن) في العمر والكل راضي
العيد يجمع في الدول كل الاجناس
وعن الخطأ كل(ن) يصير متغاضي
واللي يهنينا نهنيه باحساس
ونستذكر التاريخ في وقت ماضي
سليمان بن عبدالعزيز السنيدي - الرياض
الوضع في معناك بالحيل حساس
لوضع في معناك بالجيل حساس
يحتاج له بين الرجاجيل قاضي
الناس هاذي به مشاكل وسواس
ما عاد عند الناس ذوق وتغاضي
الله يبعدنا عن الحزن والياس
ما ينفع (ن) لو قلت فيه اعتراضي
فهاد الريس - حايل
يا ذيب ياللي با المعابد له قياس
وقياس ذيب في ظنوني تراضي
ثلاث ارباع من العلاقات احساس
وربع العلاقه مالي فيها اعتراضي
وهالربع ودك من يشيله على الراس
وتوججب الكبير دون امتعاضي
اللي نعايده تراه اقرب الناس
اللي لهم بالقلب حاضر وماضي
صالح بن إبراهيم السنيدي - الحريق (الوشم)
ويكفي ربع منهم ولاتنشد الباس
كل على طبعه ماهوب راضي
ورضى البشر مافيه طب ولا عساس
من عايدك رد المعايد مراضي
ومن صدعنك خله على فاله والاحساس
خلك كريم وفي حال متغاضي
حال تغير في طبع من زمن حاس
الدايم الله والحكم فيه ماضي
حمد عبدالله الوايلي - حوطة سدير
بيت الأسبوع
كتبه للصفحة الشاعر فرحان الظفيري ويقول:
انتي تميزتي عن الغيد بالزين
وابوك لقب بالكرم طير شلوى
نستقبل صدى البيت المطروح خلال ثلاثة أيام من نشر البيت المطروح
على إيميل الصفحة:
rb-khozama@alriyadh.com