بيت وصدى

الأسبوع الماضي كان بيت الأسبوع من طرح الشاعر محمد عبيد الديحاني من رياض الخبراء والذي يقول:ودي نصيف في مصايف بلادي
لكن جحيم اسعارها واقف لي
وقد تواصل الشعراء مع هذا البيت وتفاعلوا مع موضوع الطرح تفاعلاً رائعاً ومن تلك الأصداء الرائعة:
يا نفس جوزي وقنعي بالقعادي
لاصار ما انتي من اهل المال زلي
غصب عليك اتعاكسين المرادي
وتنسين جو التمشيه والتسلي
من يعطي التجار علم وكادي
ويلقالنا مع زود الاسعار حلي
نافع الحربي- الرياض
سعر السياحه في البلد كان عادي
واليوم روح ويش بأذكر وأخلي
ترى الطمع يذهب جميع العتادي
وين السياحه دام كل يغلي
ترى التسهل طبع بكل العبادي
حيث السياحة بالوطن ما تملي
مبارك محمد بن طرجم- وادي الدواسر
حب الوطن مغروس فاأقصى فوادي
عشقي وفيها خاطري مسفلهي
فيها المصايف للسعاده تنادي
بس عيبها الاسعار دوم تغلي
وكل عام عن عام يزود العنادي
ومابه رقابه للمشاكل تحلي
سعود جمعان العضيماني -الرياض
انشهد انك صادق بالوكادي
انا بعد مثلك وأراوح محلي
وياللي تنادي في مصايف بلادي
دوك الغلا والزود صار متعلي
انا باسافر غصب خارج بلادي
حسبي على الاسعار شي يعلي
سعود بن سعد الحافي - الرياض
يالله يامعبود رب العبادي
اللي جميع الناس لأجله تصلي
وقلت الحقيقه يا محمد وكادي
اسعارهم نار ولا فيه حلي
وفي كل عام اسعارهم بزديادي
هذا سبب خلاء المصيف يملي
راشد بن سيف بن ناصر النتيفات
يابو فهد اتنادي او ما تنادي
راع الجشع خله بفاله يولي
خذلك زهاب وخيمة شي عادي
انت الذي لاشفت ضيف تهلي
وانت الذي للجود دايم تفادي
طلق الحجاج وخاطرك مسفهلي
محمد بن عبدالرحمن ابو دحيم -البدائع
امن وامان هو مناي ومرادي
هذي بلدنا وبرضها ما نملي
فيها الهنا والخير محلا البرادي
وبلاد برا دربها ما ندلي
ولاهل العقار الكل منا ينادي
حيث الغلا يحتاج وقفه وحلي
محمد بن عبدالعزيز الخنيفر - اشيقر
معا اسرتي عايش بحرب وجهادي
الصيف واسعاره سبب ما حصلي
ان جيت ابا صيف ومشي اولادي
الاسعار تمنعني وانا اريد افلي
السعر يا مسؤول ماهو بعادي
كلش دبل وثري ياهيه يلي
سلطان بن حمد ابو شقاف الحبابي -الطائف
في كل عام اسعارها بإزديادي
ومما نشوفه زاد همي وغلي
ارفع صليب الصوت وأزهم وأنادي
متى يجي للوضع يا ناس حلي
كفى كفى هذا الغلا والتمادي
خلوا المواطن في الوطن يسفهلي
ابراهيم بن مسمار القحطاني -الرياض
يالله يا عالم بخافي مرادي
تقطع وتين الجشع لو كان خلي
جعلت حياته والمكاسب رمادي
وعساه عن درب السعاده يضلي
من يستغل الناس حضر وبوادي
يا محكمين الشرع هل فيه حلي
علي جابر الزولاني الفيفي -فيفا
والله انا مثلك اطالب وأنادي
ما من رقيب ولا مجيب يدلي
قالو وزاره للسياحة نشادي
وتشجع اللي في بلدنا يسلي
ابها البهيه للسياحة تنادي
والطايف الخضراء ترحب تهلي
محمد عبدالله المحلي- حوطة بني تميم
قالو نصيف يم ارض المعادي
ثلاث الاف وكثرهن ورد فلي
ولي هنا اسعارنا شي عادي
امن وكل حجاج به مسفهلي
ان ما كسبت ابن البلاد انت غادي
ترى السياحة علم ماهو تسلي
فلاح مطر -القريات
مابدى بر جوى خير والي وهادي
يرخص اسعار الشقق نسفهلي
وان ما حصل شبيت ضوي بوادي
واقهوي المصطاف من دلة لي
ياهيئة التطوير شفت الزهادي
ياهيئة التطوير مافيه حلي
حجاب بن فرج القحطاني -الرياض
اللي يبي جو لطيف وبرادي
يصبر على اللي وقتها يستغلي
هاذي بلدك ودوم رايك سدادي
امن وامان والمعزب يهلي
عليك بالطايف وذيك المبادي
ودار الحرم فيها تقيم او تصلي
غنام مسعود ال حويل القريني- نعام
بيت الأسبوع
كتبه لزاوية بيت وصدى الشاعر محمد نخيلان الحربي من القصيم ويقول:
متقاعدين على الف وخمس مقصوره
وإن زاد عنهن تجاوز حول الالفيني
والبيت يناقش قضية رواتب المتقاعدين ونستقبل صدى البيت بثلاثة ابيات فقط تناقش القضية على فاكس 4871070 خزامى الصحارى زاوية بيت وصدى.