@ ابو العريف اكيد الموسم ساخن عندك من البداية؟ * بس انا مش هامني حاجة لا (كورة) ولا مباريات ولا (حاجة) حتى اني كل يوم في مكتبي اجمع لي بعض الموظفين اللي يحبهم قلبي وافطر معاهم في المكتب الخاص بي، والمراجعين اخليهم بر المكتب ينتظرون ساعة، نصف ساعة، حتى يخلص صحن (الفول والحمص) وخاصة صحن اللحمة بالطماطم من المطعم التركي، ترى الاتراك يضبطون مثل هالشغلات..!! @ ابو العريف ، وين عرجت، ترى المسألة كرة، وين رحت الى مكاتب ووظائف وفول وحمص..!! * ترى حتى هالامور فيها كرة، وأسأل اللي في بالي، تراه يهتم بالفطور اليومي في مكتبه، ويضرب حنكا، ويقرأ صحفا، بس هذا كل همه. @ مين هو هذا اللي تقصده يا بو العريف؟ * واحد ملقوف حاس الدنيا، وهو ما عنده عند جدتي. @ يعني لازم تقول اسمه يا بو العريف؟ * هو معروف جدا جدا.. خاصة هذه الايام، وانا قاعد له قعده، سنشوف مين يكسب الجولة، انا ولا هو ترى الناس اطلقوا عليه ملقوف، وبس تسمع كلمة ملقوف ترى هو المقصود. @ طيب يا بو العريف خليني اروح معاك على مباراة الخليج مع الاتحاد اليوم؟ * خلاص المباراة ما تستاهل لاني بصراحة ما ادري اشلون اروح ملعب الراكة المهجور من عدة سنوات، واشلون المباراة بتقام في الراكة على الرغم ان استاد الامير محمد بن فهد بالدمام، يعني الخليج من سيهات يلعب في الخبر.. اكيد اللي كتب التقرير يحب ويعشق الخليج من زمان..!! @ من زمان يعني متى؟ * تقدر تقول لم كان الخليج ينافس في لعبة كرة السلة..!! @ يعني ماكو جمهور للخليج في الراكة امام الاتحاد؟ * أسأل اللي كتب التقريرين عن ملعب نادي الخليج، يعني مش خطاب واحد، خطابين، الرجال عنده اصرار كبير على عدم اقامة المباريات في الخليج. @ يمكن البعض يا اخي يحب الهدوء اكثر في الملاعب؟ * في هذي صدقت، البعض يحب الهدوء، والراكة ملعب هادئ جدا جدا جدا!!