تخاريف "أبو العريف" ..!!

@ يالخراط يابو العريف وين خطتك مع الزمالك تقول فارق هدف لاتفاقك والنتيجة 3/1 عليكم.
* يا زعلان.. ترى النتيجة ماشية على الخطة، لولا حبيبنا الجمعان.
@ الجمعان ولا الحربان ولا البكر ولا يوسف سيف المهم انك طلعت خراط..!!
أقولك يالحبيب اشوي اشوي علينا ، ترى ان توقعاتي لمباراة في البطولة العربية مش مباراة في حواري الدمام يطلع فيها الجمعان كأنه عنترة شايل سيفه، او كأنه ابو العريف في كتاباته، الله يهديه خرب توقعاتي كانت المباراة 1/صفر لولا هالطرد اللي قلب النتيجة.
@ يابو العريف اوراقك محروقة خلاص.
* من حقك تشمت ، الله يسامح اللي في بالي اللي خلى امثالك يواجهون ابو العريف اللي يخوف ولا يخاف.
@ خلك عاقل يا بو العريف ولا تطلع فيها مرة ثانية .
* ليش ما اطلع ترى الفارس اكدها من العربية انه في الموسم الجديد نار على نار، وان المربع هالسنة ما بيطوفه، خذها مني يالحبيب.
@ أخاف يطلع هالتوقع مثل مباراة الزمالك؟
* موعدنا الدوري الجاي ترى الاتي غير، بس مو مثل هالسنة لجدة غير، غير بحق وحقيقة بس هالادارة تستمر واعضاء الشرف يبخون اشوية من جيوبهم مثل الاندية الكبيرة، الله يهديهم على هالوعود ماحنا شايفنا شيء، اجتماعات (أخرطي) لا وكل اجتماع ثلاث ساعات والنتيجة فالصو.
@ ترى حتى الخليج وضعهم نفس الشيء ، يقولون الادارة استقالت؟
* الحال من بعضه، لكن الخليج على قولة المثل العامي (قالوا صفوا صفين، قالوا احنا اثنين) كل اللي يدفع للنادي ما يتعدون اثنين او ثلاثة ليش المجلس الشرفي ما أدري.
@ يعني يا بو العريف.. موضة الاستقالات بتصير، او المسألة كلام جرايد فقط.
* والله مساكين، ترى ادارة الاتفاق وادارة الخليج عشرة على عشرة بس الزمن (مش) راضي يسير معهم، كلما (طقوها) تطلع (عوجه) يمكن لان ادارة الناديين مثالية : وهالزمن اللي يتعامل بالمثالية رايح وطي.
@ والقادسية عندهم الوضع عال العال؟
* البركة في ابو صقر، شايل النادي على رأسه ، بس ترى الطريق وعر..!!
@ ابو العريف خلني اصارحك.. اذا الخليج يجدد مكوثه في الاضواء لموسم آخر.. فالبركة في اندية القطيف، والدليل موقف النور لمن تنازل عن بشار عبدالله وفادي العبندي.
* النور بيض الوجه مع الخليج، لكن الترجي خاصة مسؤولي الترجي قول وفعل والدليل صفقة الكدادي (الله وكيلك كأن اللاعب في حراج سوق الخميس من نادي لآخر مين اللي يدفع اكثر) ونصيحتي لنادي الخليج لا يفكروا مرة ثانية يطرقوا باب الترجي.