تخاريف "أبو العريف" ..!!

@ ابو العريف الدنيا ماشيه معاك هاليومين؟
* تقدر تقول (هافن هاف) باللغة الانجليزية الا ما اعرف منها سوى OK و(ليس) و (نوه) وغيرها الله وكيلك اطرش في الزفة, بس دايم اسوي نفسي متطور واطالع (سي ان ان) مع الشباب وحدي بس افهم الصور التي تعرض على الشاشة.
@ منذ البداية يا بو العريف (سي ان ان) خلها لنهاية الحوار حتى ندردش معاك اشوي في الرياضة؟
* يعني انت مصدق اني اتباع اخبار السياسة, حدي اخبار الفن, واخبار الحفلات الغنائية, واخبار (الكورة).
@ يعني اخوي ابو العريف من الربع؟
* اف عليك ترى الانسان العربي احسن له يتابع مثل هالامور ولايدوخ نفسه في سياسة ولاخرابيط, لان نهاية التفكير في هالامور مستشفى (المجانيين).
@ ترى حتى (الكوره) تخرج مجانين؟
* والله صدقت خاصة الي يشجع الخليج, قلب محروق في نهاية الموسم, وعقل مفقود, واعصاب تعبانه, بسبب اقدام وقلوب طائشة في فريق القدم لاتعي المسؤولية الملقاة عليهم, والافضل ان يعامل هذا الفريق كما يعامل فريق الجودو بالنادي لا اهتمام ولا جمهور مسكين يحرق قلبه, ويتعب اعصابه.
@ الظاهر انك شايل على قدم الخليج, مساكين فريق بدون امكانيات, وتظلمهم انت بكلامك القاسي؟
* الظاهر انك عايشن في المريخ, مكافآت يعطيونهم حتى في التعادلات, والادارة صارفة دم قلبها على هالفريق, وظلمت فرق النادي على حساب الفرق الاخرى, ومع ذلك حرقوا اعصاب جمهورهم اللي شجعهم حتى في مباريات الجوف وحائل, لكن الاحساس معدوم عندها للاعبين عفوا انصاف اللاعبين, لانهم لايحملون من صفة اللاعبين سوى الفانيلة والحذاء وحرام فيهم جمهورهم الوفي.
@ خلنا نطلع عن الخليج حتى لاتزيد الغلة في مهاجمة هاللاعبين, ولكن ليش ما تهاجم المدرب او الادارة؟
* المدرب حرام فيهم والادارة.. الادارة ياحسافة على الاموال التي صرفتها على هالفريق, وما اقول الا ان الادارة ظلمت فرق اليد والسلة والطائرة والعاب القوى من اجل فريق لايستحق ان يحملوا شعار الخليج.
@ اذا فيك خير يابو العريف, عرج على الاتفاق, ليش هالفريق ماحرق اعصاب جمهوره, والا ان وراء هالفريق ظهر ما تقدر تهاجمهم؟
* يالحبيب وقفتنا مع الفريق الاتفاقي رغم انتكاسته في الدوري, كونه حقق بطولة في بداية الموسم, لكن ولايهمك من الآن احنا وراءهم واذا فشلوا في العربية, الزود عندنا, انتظر فقط واتشوف ايش نسوي.. ليش ما تتذكر موضوع الشيشة بداية الموسم ولانسيت يالحبيب.
@ والقادسية اشوفك انقلبت 180درجة بعد ما كنت تذم اصبحت تمدح؟
* وليش لا.. ومو عيب ان نقف معهم طالما انهم ردوا علينا بالنتائج والمستويات والعروض, بل العيب ان نكابر ونستمر في الانتقاد والفريق ينافس على المربع, واذا كانت القادسية قد كسبت الجولة مع الميدان فذلك لان الميدان صحح الكثير من المفاهيم الخاطئة في الفريق القدساوي واولها الهدف الذي حدد بالبقاء فقط, وكان الميدان ينظر ان القادسية بامكانها المنافسة على لقب الدوري وفي النهاية تأكدت صحة نظرية الميدان.