مكاشفة.. أبو العريف والمبرقعة!

ابو العريف ويش عندهم لاعبي الاتفاق مع الشيشة والمعسل؟
والله يقولون بيرجعون للمنافسة، لكن صدرهم من هالشيشة منعهم من المنافسة.
@ يعني وش الحل معهم؟
والله الادارة مصممة تلغي عقودهم الاحترافية، لأن الناس غير مستعدة تصرف من جيوبهم ملايين واضيع في الشيشة والمعسل.
@ ابو العريف يقولون ان بعض لاعبي الخليج مثل بعض لاعبي الاتفاق يحبون المسعل؟
لكن ادارة الخليج ماتحرك ساكن، ساكته عن لاعبيها، بعكس ادارة الاتفاق التي هددت لاعبيها.
@ ولاعبو القادسية؟
ما يقدرون وراءهم الزامل والياقوت "شديدين" وايد.
@ ابو العريف هالشيشة بس للاعبي الشرقية؟
في جدة خير وايد بعد.
@ ابو العريف خلنا من سالفة الشيشة، وتعالي قولي ويش سالفة عبدالله الجمعان؟
وعند جهينة الخبر اليقين.
@ ومنهو جهينة؟
يقولون منصور البلوي وسعيد العويران.
@ ابو العريف ثقلت عليك في الاسئلة، لكن ما تشوف الاتفاق جايب اللي اسمه ريز برغن، والقادسية بعدهم مع العجلاني؟
برجر ولا يرغن "ابو عجله" صعد بالفريق، وانجازاته تتحدث عنه.
@ لكن دوري الممتاز غير دوري الدرجة الاولى؟
عند الامتحان يكرم المرء او يهان.
ابو العريف الا بسألك ويش سالفة رئيس الاتحاد مع نصر هلال؟
الهلال خسر السوبر والنصر ما حقق بطولة العام الماضي، ورئيس الاتحاد جمجوم في حاله مسكين، والله يعينه على بلواه.
@ يالغبي انا ما اقصد جمجوم، اقصد سالفة نصر هلال مع محمد المطرود؟
لا تورطني مع اهل سيهات، ترى هم صايرين هالايام مثل تايسون شغلونا بالمطرود ونصرهم وهلالهم، وهم حتى الدوري الممتاز ما صعدوا له في حياتهم.
@ يعني ما منت معلمني السالفة؟
صدقني ما اعرف الحق مع من ، لكن اعتقد اعتقد اعتقد وبس!!
@ ابو العريف يقولون برجر اقصد برغن جابوه الخليج قبل 22 سنة ولعب معهم؟
تصدقني انه (مفهي) عندما سألوه الصحفيين ما ذكر انه لعب في السعودية.
@ معذور لان الخليج خلوه يدرب على ملعب ترابي.
المبرقعة ابتدى برنامج من سيربح المليون، خلني اشوفه.
وي اصبح ممل جدا، مثل نتائج النهضة في السنوات الاخيرة.