مكاشفة.. "أبو العريف" مع المبرقعة

@ أبو العريف ويش آخر الأخبار؟
ناطري يا المبرقعة موقعة الأحد بين ما نشستريونايتد وليفربول، أقصد الاتفاق والقادسية بعد (الصجة) و(الضجة) اللي سواها اداريو الفريقين عبر الصحف.
@ يعني تتوقعها نار؟
في حالة واحدة فقط
@ ويش هي؟
جمهور الشرقية النايم، اذا حضر أكيد بتصير المباراة نار على نار.
@ بصراحة ويش تتوقع بعد المباراة لجاسم الياقوت وهلال الطويرقي؟
المهزوم (الله يستر عليه) نار الصفقات بتعود..!!
@ أبو العريف يقولون إن الاتفاق ضامن (ست) نقاط من لقائي القادسية.. وانت ويش تقول؟
ذاك اول، ها الحين في "أبوعجلة" (العجلاني) راح يوريهم الويل، لابرغن ولا غيره يوقف صوبه.
@ أبو العريف هو هاني السالم لاعب الخليج ويسري الباشا لاعب العدالة مستواهما مثل ماطر والتمياط؟
اقول (مصائب قوم عند قوم فوائد) والله الاثنين "لا يستاهلان" ربع صفحة.. بس الصحافة ولعتها، وطلع فيها السالم (رونالدو) والباشا (ريفالدو).
@ أبو العريف ويش السالفة مع عمر المهنا؟
صدقني يا المبرقعة ان المهنا مثل ماجد عبدالله كل ما قالوا انتهى رد عليهم في (الميدان)، عيني عليه باردة حكم ولا اروع واسم في القمة، والبعض بمناسبة وبدون مناسبة يبي يحط فيه.. تدرين ليش.. من غير ليش..!!
@ ويش عنده ليزر كرة اليد السعودية.. اقصد هاني هلال؟
خليه في حاله ترى له (قروش) عند الخليج لحين ما يعطونه اياها، والرجال محتاج ل (القروش) من شان..!!
@ تقصد "ابو العريف" اني قرأت في الصحف ان النهضة اول فريق يحقق كأس الاتحاد لاندية الدرجة الاولى؟
كان زمان..!!
@ اقولك ترى لاعبي يد الخليج (الله بالخير) النادي مافيه فلوس وكرموهم، وبعد يتكلمون ويثرثرون؟
الله يخلي لنا (ابوكريم) المهندس اللي ما تسمع صوته، لا في فرح ولا حزن ولا فلوس ولا تكريم، بس الله يهدي ها الادارة اعطت اللاعبين شيكات، ولا استفاد بعض الناس.. اعطوهم (كاش) حتى يستفيد البعض لو حق (الشيشة) فقط.
@ تدري ليش يا "ابو العريف" بعض لاعبي الاتفاق فرحوا بالباشا؟
ادري فكروه اللي في باللي..!!
@ أبو العريف خلك عاقل، ولا تخور ، ترى الكرة بدأت من يوم الاربعاء الماضي.
اللي حارق قلبي ان ها الشركة الجديدة رفعت سعر التذاكر.
@ بصراحة ذكية ، لانها شافت العام الماضي الجمهور ما يحضر المباريات، قالت ترفع سعر التذاكر لأنها تتبع مقولة (الغالي سعره فيه).
@ العريف سمعت اخبارا طيبة عن مهرجان ماجد
انصحك ان تسمعي اغنية كوكب الشرق (لسه فاكر).
@ يعني فكرك.. ننسى الموضوع.
لا، لكن سيقام عام 2099م
@ اقولك.. الشركة اللي اخذت حق تذاكر الملاعب، سوتها في الصحفيين، خلت الواحد منهم لا يدخل الا ملعبا واحدا.
اخبارك قديمة يا المبرقعة تدخل ولد الحسين حبيب الصحفيين وسمحوا لهم دخول كل الملاعب.
@ ابو العريف تتوقع مواجهة رئيس النصر مع جماهير النصر ستكون حامية الوطيس؟
ما دام فيها (خوش بوش) ومسيلمة الكذاب، وملف ماجد عبدالله، يعني فيها نار وحرارة ومتعة، ودعابة (ابو عبدالعزيز) المعروفة عنه.. خلونا نشوف بكرة الجزء الاول، واجاوب على الباقي الجمعة الجاية.