مكاشفة.. أبو العريف والمبرقعة

أبو العريف اعتقد ان اليوم عندنا حكي وايد، وحش وايد بعد، تدري ليش، لان الدنيا مولعة بين الاتفاق والقادسية.
* ادري فيك يالمبرقعة، تموتين في شيء اسمه (فتنه).
@ هذا عيبك يا بوالعريف، دايم تفهمني خطأ.. واحين بسألك ويش سالفة احتجاج الاتفاق ضد القادسية في قضية السالم.
* يقول جاسم ياقوت للطويرقي (بلها واشرب ميتها).
@ هو قال (لا تقدم ولا تؤخر) ولكن صحفيكم الله يهديه راح وعنونها (بلها واشرب ميتها).
* لان يالمبرقعة كلمة (لاتغني ولا تسمن من جوع) وكلمة (لا تقدم ولا تؤخر) هذه كلمات عند الخليجيين والصحفي فسرها باللهجة المصرية (بلها واشرب ميتها).
@ ما علينا.. لكن اعتقد ان الاتفاق رد الصفعة للقادسية بلاعب العدالة يسري الباشا.
* هالزحمة وهالتصريحات وهالمناوشات كلهاماتهم جماهير الاتفاق ولا القادسية، لان (الميدان يا بو حميدان) واذا (نبشر) السالم والباشا في الموسم الحالي مالهم الا (الباب).
@ ابو العريف، الا بسألك ويش رأيك في دفاع الياقوت عن ناديه، وخاصة لما رد على الطويرقي؟
* انا اللي اعرفه دفاع حسين هزاع لاعب الخليج في كرة اليد حيث يلقب بملك (الدشنغ) وحاليا مالك زاكي، وطبعا الفارق النظارة على وجه الزاكي.. آخر موديل.
@ ابو العريف.. لا تتهرب من الاجابة.. شفت انك جبان؟
@ يالمبرقعة.. ترى هلال (لسانه طويل.. وقلمه يوجع) والياقوت متحدث لبق، وعارف بالقوانين واللوائح، وي مين تبين اوقف؟
* مادام المسألة كذا.. بلاش تجاوب احسن.. لكن عندي سؤال بريء جدا.. جدا.. جدا وهو الخليج طلع خسران او ربحان؟
لاخسران ولا كاسب، لان اللاعب اذا ما له رغبة في اللعب بالخليج ويش الفائدة من بقائه.
@ ابو العريف رأسي انفجر، خلنا نطلع من حدود اندية الشرقية، وخلنا نعرج على ولد الكثيري اللي فجرها في لقاء (الميدان) وما فيه واحد سلم منه.
* يالمبرقعة.. ترى حتى نفسه ما سلمت من لسانه، لكن عجبني الثنيان وقفاه عند حده.
@ اشلون يعني..
* السيارة.. انا قلت فقط السيارة، ما قلت (شيء ثاني).
@ لكن يابو العريف، ما تحس ان ولد الكثيري كثيرا ما يتناقض مع نفسه في مناسبات عديدة.. خاصة حول ماجد عبدالله؟
* تبين الحق او ولد عمه، كلما انحسرت الاضواء عن الكثيري حاول القفز على اكتاف ماجد من جديد، مرة يمدح الاسمراني من اجل نرفزة الهلاليين، ومرة يذم ماجد من اجل تحريك مشاعر النصراويين، وفي الحالتين هو الكسبان.. طبعا اعلاميا.
@ ابو العريف.. لكن ولد الكثيري له قاعدة من القراء؟
* صحيح لكن اغلبهم من..
بديت اتغلط يا بو العريف.
ليه.. هذي هي الحقيقة، ترى يقولون مرات كثيرة ولد الكثيري يكتب باسماء نسائية.
@ الظاهر يابو العريف انت ما بتجيبه للبر مع ولد الكثيري، خلنا نبعد عنه، علشان لا يسوي فيك، مثل ما سوى فيه الثنيان.
* واحين.. آبي اسألك سؤالا صريحا جدا.. جدا.. جدا، واتمنى يابو العريف انك ما تتهرب.. مين السبب في عدم اقامة مهرجان اعتزال لماجد عبدالله.
@ يالمبرقعة ابقولك قناعتي الخاصة، ماجد فنان وشاعر ورسام، وطيب وخلوق وقلبه طيب، ومتواضع وكل الصفات الزينة فيه، لكن للاسف ما عرف اشلون يلعبها صح، وهذي مشكلة ابو عبدالله، وقبلها نلوم الآخرين، علينا ان نوجه اللوم بالدرجة الاولى للاعب نفسه، لان التأخير مو في صالحه.
* والحل؟
قولي الله يفرجها.. وسهل امور الاسمراني، ويلين قلوب بعض الناس عليه.
@ ابو العريف.. ويش اخبار سامي؟
* انا اشهد انك يالمبرقعة تمارسين الخبث معايه، يعني حبكت تسألني عن سامي بعد ماجد..
@ ويش فيها.. لا تصير متعقد مثل بعض النصراويين والهلاليين.
* المسألة ما فيها تعقيد المسألة فيها (تفسير).
@ واشلون تفسير؟
* كل واحد بيفسرها على كيفه.. خلنا يالمبرقعة ننهي حديثنا هالاسبوع على خير.