تخاريف "أبو العريف" ..!!

@ شوف يا ابو العريف خليك بعيد عن هالحرب, وخلنا في كرة القدم.
* المشكلة ان هالحرب ما جات الا لما الخليج قام ينافس على الصعود.. ايش هالنحاسة!!
@ تدري ليش؟ لانك منحوس تشجع الخليج وجبت العيد لهم.
كأنك داري ان النحاسة جاية مني, يعني تقدر تقول ان من اهم اسباب الحرب هو ابو العريف؟.
@ يعني نقدر نقول ان نحاستك يا ابو العريف (دولية) وتخطت حدود المحلية.
للأسف توني مكتشف نفسي, الله يهدي هالحساس دايم مفشلني, حتى العجلاني جاب لي العيد ونافس مع فريقه على المربع, وكنت اقول في بداية الدوري حده نهاية الدور الاول, لكنه نافس, واقولك شيء يالحبيب ترى لو شجعت العجلاني كان حده البقاء في الأضواء.
@ الا يا ابو العريف الاسبوع الماضي كتبت عن (الفنتازيا) وانا الى الآن ما فهمت هالكلمة.
* هذي مشكلتي معاكم يا قراء هالزاوية حدكم هالمستطيل الاخضر ما تعرفون شيء, صيروا مثلي مثقف جدا, لكن احب اقولك شيء ترى حتى انا ما موفاهمها, لكن حبيت استعرض عضلات على القراء واثبت لهم اني مثقف, ترى اغلب المثقفين عندنا يتكلمون بمصطلحات وهم مش فاهمينها, صدقني.
@ طيب خربط لنا عن (الفنتازيا) يمكن تطلع لنا بآراء تصب في هذا المصطلح.
يا عزيزي (الفنتازيا) مثل صراع الاتفاق على البقاء في الدوري والفوز بكأس ولي العهد, اعتقد ان هذا الجواب (مسكت).
@ يعني اقدر اقولك ان اجابتك مثل كتابات ولد الديرة في (الميدان الرياضي).
* الله يهديك ويا خوفي لما طريت اسم ولد الديرة يستخدم البكر حق (الفيتو) ويستخدم قلمه الاحمر اللي يشطب نصف تخاريف ابو العريف ترى هو هاليومين قاعد لي بهالقلم الاحمر يمسح ويشطب, والسبب الله يهديه ولد الديرة, لو يخفف اشوي من هالضرب تحت الحزام كان احنا بخير.
@ يعني نقدر نقول انك ضعيف واخرطي.
* ما تشوف قلبت مع العجلاني 180 درجة مجبر ابو العريف لا بطل, لكن ابو عجله كرمنا بخبر انفراد عدم تجديد عقده واللي مدحوه طوال هالسنوات ماعطاهم على قولة اخوان اللبنانية (هيك خبريه).
@ اسمح لي يا ابو العريف ممكن اوصفك بالشخص المتلون.
* كل شيء في هالزمان جائز انت ما تشوف امريكا تفتخر ان انغولا معاها في الحرب ضد العراق, متى كانت امريكا تعترف بأنغولا.. انه زمن العجايب يالحبيب.