مكاشفة ابو العريف مع المبرقعة..!!

ابو العريف هالاسبوع عدنا سوالف وايد، نسولف عن هزيمة القادسية او تقبيل الرأس، او سالفة برغن والعجلاني، ولا الصرناي ولا ايش.
باين عليك يالمبرقعة ما ودك هالاسبوع تجيبها الى بر..!!
@ ابو العريف.. مين هو اللي كسر عظم الثاني الاتفاق او القادسية؟
تبين الحق ولا ولد عمه.. صحيح الاتفاق فاز، لكن مو بشطارته، لكن بشطارة طيب الذكر.
@ ومين هو طيب الذكر؟
اللي في باللي.
@ لكن ما تشوف ان فرحة الاتفاقيين (وايد...!!) كأنهم فائزون ببطولة الدوري؟
من حقهم يفرحوا ويهيصوا كمان (لان الفريق اللي) فازوا عليه مش هو منافسهم (التقليدي) وهذا الكلام ترى هو كلام الطويرقي.
@ المهم يا بو العريف ان الاتفاق هذا الموسم يبيض الوجه؟
طبعا رجع لهم الرئيس الذهبي عبدالعزيز الدوسري اللي خلى النادي يمشي مثل الساعة، ترى حتى وهو في اجازته تلفونات ليل ونهار مع الاعضاء.. هذا الذهب.. ذهب ما يصدأ.
@ الا .. ابسألك ابو العريف لحين الاتفاق ما جاب لاعب أجنبي؟
صدقيني كل ما اسمع ها السؤال على الطول اتذكر مسلسل ليالي الحلمية.
@ ليش.
لان عامل الوقت والسيناريو في الموقفين مثل بعض.
@ ابو العريف ايش فيه اللي في باللي كل يوم له تصريحين في كل جريدة؟
تقصدين من؟
@ انته تعرف زين.
من حقه يا اختي عمل واجتهد ونجح، وموتي قهر انت مع اهل الخبر، ترى انا جبت اهل الخبر علشان الجملة تركب مع موتي قهر ومو قصدي شي ثاني ابد..!!
@ ابو العريف فيني حره على اللي وضع جدول هالمسابقة.. الاولى نار وحديد وكهرب، والثاني تأهل الفريقين من اول جولة مو حرام.
خليها على الله.. وقولي يا كافي الشر من الجاي.
@ مارديت علي عدل يا بو العريف كلامي صح ولا خطأ؟
والله ما دام هي بطولة جديدة في نظامها ولوائحها، يجب ان يكون تصنيف الفرق على نتائجهم في الدوري الممتاز لدرجة الشباب على اعتبار ان البطولة تحت سن 23 عاما، لكن الشباب ما عندك احد في ها اللجنة.. ويش قال (احادي وزوجي) والنتيجة مثل ما انت شايفه..!!
@ ابو العريف منت شايف ان اللجنة الفنية ما تأخذ برأي مسؤولي الاندية دائما؟
الله يهديهم حتى مسؤولي الاندية لهم ألف رأي ورأي.
@ أقولك مين اللي فاز الاتفاق او الهلال؟
للأسف يالمبرقعة تراني كاتب هذا الموضوع قبل المباراة، لكن اعتقد ان الفايز يحب اللون الازرق.
@ يعني الهلال.
نعم ممكن يكون هلال.
@ انا مو قصدي هلال الطويرقي انا قصدي الزعيم.
@ حسبي الله عليك يا بو العريف دايم تكون جبان في المواقف اللي هيه..!!
ابو العريف دايم كنت تمدح في ابوعجلة، وتقول انه بيفرمل بيرغن.. لكن العكس صحيح.
@ اسكتي.. (عادت ريمه لعادتها القديمة).
اشلون؟
@ الله يهديه يعشق الدفاع، مثل ما يعشق قيس ليلى.
@ ابو العريف ترى هاني هلال التحق بمنتخب اليد؟
ويش الغريب في الامر.
@ انت تدري ويش السالفه؟
اللاعب انتظم.. يعني كل الكلام اللي طلع (خرابيط).
@ سبحان مغير الاحوال.. يا ابو العريف.. مين كان يصدق ان اللي صار الاسبوع الماضي يصير في الشرقية.. جمهور.. وتصريحات.. وتحديات؟
البركة في جريدتكم (....!!) ترى هذا باعتراف الزياني.
@ لكن ما تعتقد ان القدساويين حاملين اشوي على الطويرقي؟
صدقني لا، لان ابو خالد قلبه (ابيض) ويحب القادسية ترى، وصدقني انه يتألم لو خسر القادسية من فرق أخرى، لان (الطويرقي) انسان اصيل، وقلبه ابيض، وبعد ما يعرف الدسائس، وكل من تعامل معه يدرك حب هذا الرجل لرياضة المنطقة، شفتين كيف تنازل عن قضية السالم.
@ ابو العريف سؤال أخير، ليش الجمعان مو جايبها لبر؟
لان الطائرات الخاصة لها طعم ثاني.