تخاريف "أبو العريف" ..!!

@ أبو العريف: نقدر نقول لك مبروك بقاء الاتفاق في الأضواء، ووصول القادسية للمربع، وصعود الخليج للأضواء وعودة الوحدة للممتاز؟
ممكن الأمنية الأولى تتحقق، والثانية كذلك، بس الثالثة ما ظني اما الرابعة أكيد تركب وتضبط، ما أدري الشي اللي صاب هاللاعبين يوم تقول عنهم ريال مدريد، ويوم آخر تقول عمرهم ما لعبوا (كورة) يمكن يكون لغز قدم الخليج مثل لغز اختفاء صدام، حيرة في حيرة، راحت نقاط أحد والأنصار والمباراتين في سيهات. شيء يطلع الواحد من (مناخيره).. أما الأخيرة الوحدة واصل واصل.
@ والحل مع الخليج؟
لازم نشوف عراف يقرأ الكف، والا تدري خلنا نسمع قارئة الفنجان لعبدالحليم حافظ، يمكن نلقى تفسير لقدم الخليج.
@ والقادسية.. تتوقع تتنافس على اللقب لو وصلت للمربع؟
كفرات العجلاني مرسيدس تحب الخطوط الطويلة.
@ أبو العريف سمعت أن الاتفاق بيشارك في البطولة العربية؟
الله.. الله.. الله على ذاك الزمان، زمان 88م بالشارقة أيام الانتصارات الزيانية، الله يعودها، وأعتقد ان الاتفاقيين أرسلوا الزياني في اجتماع القاهرة حتى يتذكروا ذلك العهد، صدقني انه فارس خطير جدا في البطولات الخارجية.. بس خله يطلع من هالمجنة اللي هو فيها ولكل حادث حديث.
@ تصور يابو العريف، الخليج يصعد، والقادسية للمربع وينافس، والاتفاق يبقى.. تشجع مين فيهم؟
الله يهديك تحلم كثير أنت، خل هالأمنيات تحقق تالي أقولك أشجع مين.
@ أبو العريف فاكر ولا ناسي؟
حلو هذا السؤال كأنه شعر، فاكر والا ناسي، يا الحبيب أنا فاكر وناسي، لعبناعليك في هالجواب.
@ توه اللعب بادي يابو العريف لا تقول انتهينا، بتصير لي مثل جماهير الخليج اللي صعدت فريقها قبل انتهاء الدوري، فاكر اعترافك الاسبوع الماضي انك هلالي، وناسي انك قلت اتفاقي في بداية السنة.
يا أخي أنا مع القوم يا شقره.. اللي يحقق بطولة أنا معاه، الاتفاق حقق بطولة الأمير فيصل بن فهد صرت معاه، والهلال حقق كأس ولي العهد صرت معاه، والفريق اللي بيفوز بالدوري باصير معاه، ترى الناس هالأيام ما تعرف لها دائما مع القوي والفايز، ليش ما اصير (...) مثلهم، هذا زمن (...) يا حبيبي.
@ لكن أكيد لو أن انصر ياخذ بطولة، بتقول انك نصراوي؟
نصر ماجد عبدالله والهريفي راح، خلكم على تيرنيو وبوسكاب يمكن تحققون بطولةعام 2007م..!!
@ والأهلي ممكن يطلع فيها ويكسب الدوري؟
الأهلي فريق بطولات، ويكفي أن شعاره مثل قلبي (أخضر).
@ والعميد مثل الاتفاق والقادسية والخليج؟
يكفي أن الأتي كله عسل، جمهوره، لاعبيه، حتى مدربه شيء عجيب غريب، صحيح هم غيروا 19 ألف مدرب في سنة لكن العميد يكفيه هالجملة (عسل عسل الأتي وصل).
@ والشباب.. ماله في قلبك غلا؟
أف.. الشباب عيني عليه باردة، حلو في كل شيء، واعتقد أن المستقبل له.
@ نقدر نقول يابو العريف انك بدون مبادىء؟
خليت المبادىء لك يا الحبيب، حاول تتعشى وتتغذى عليها.
@ شويه.. شويه.. هدىء أعصابك يا بوالعريف، تراك قمت (تخور).
الله أكبر يا ناصح، كل اللي قاعد يصير وتبيني أصير صاحب مبادى، ترى حتى أصحاب المبادىء (لك عليهم) ظاهر زائف.. والله يستر من المستخبي..!!
@ صدقني يابو العريف اكتشفت انك شخص غريب الأطوار؟
لا يا شيخ.. عدال يا افلاطون، تراني ما أعرفه بس أسمع باسمه، لكن حبيت اسوي نفسي (مسقف) مثل المحللين السياسيين في القنوات الفضائية، اللى ولا واحد طلعت تحليلاته صحيحة عن الحرب، كلام مصفوف لا أكثر.
@ يعني التحليل الرياضي العربي أكثر دقة ورصانة واقرب للواقع من التحليل السياسي؟
الله يهديك.. أين الثريه من الثرى.. الله يخلي ماجد والأمام والشتالي وحماده واقع وجرأة ومصداقية بدون رتوش ونفاق وحقد وهي مصطلحات يستخدمها المحليين السياسيين دائما.
@ والله يابوالعريف منت بسهل.
أف توك عارف، أنا ابو العريف اللي يسموني (الخراط).
@ أف.. يعني خطير.. والا (اخرطي).
أناعربي، دايم اتحدى، واتكلم، وأهدد، ونهاية المطاف (انحاش) لا يغرك هالغشمرة، تراني..!!
@ أبو العريف يقولون عضو شرف الهلال عبدالعزيز بن جري زعلان لخروج النصر خالي الوفاض من الكأس؟
وأزيدك من الشعر بيت، امتنع عن الأكل والنوم حزنا على هذا الخروج، ومتألم لأن الاتفاق تعادل مع النصر، وده الأخير يفوز حتى يتأهل للمربع.
@ أكيد الهلاليين زعلانيين منه؟
حتى الآن اعلومه ماجاتني، وأول ما توصلني معلومات عن غضب الهلاليين سأعلنها الأسبوع القادم.
@ لكن يا بو العريف ما نسمع له حس، إلا اذا فاز الهلال ببطولة؟
تراه ما يحب الترزرز، ولا يحب الشهرة، ويعمل بصمت.