تخاريف "أبو العريف" ..!!

@ ابو العريف اعتقد ان الطريقة ضابطة معاك.. والا الهوى شرقي..!!
الهوى والحب والرومانسية هالاسبوع وكل مفردات الوجدان والعاطفة هالاسبوع (شرقاوية).
@ ليه يابو العريف..؟
قلت لك من زمان مشكلتك انك على باب الله، همك في هالكورة وبس، ما عندك ذوق مثلي للشعر والشعراء.
@ ايش عنده نزار قباني. أوعى تقول لي انك شاعر يابو العريف.
الله يهديك، أنت مادريت ان (البارحة) الساحل الشرقي تعطر بقصائد سمو الامير سعود بن عبدالله.
@ الله يابو العريف ليش ماقلت لي أروح؟
الله يهديك الخبر منشور في الجرايد بس الله يهديكم ما تحبون (تقرون).
@ عدال.. يا نجيب محفوظ..؟
ليس التجريح.. تراني من انصار محمود العقاد، وليس من انصار المحفوظ، واعتقد ان المطلوب هو ان تنصفني ثقافيا.
@ ابو العريف نراك ذبحتنا ممكن تطلع من الشعر، وتعرج على الاحباب في القاهرة.
عيب يافتى.. ايش الكلام اللي قاعد تقوله..!!
@ لا تطلع فيها اقصد ربعنا الاتفاق؟
خذها مني، وضعت الخطة لرئيس النادي، بس هالمرة مش عزيمة في السفينة الفرعونية، هالمرة شئ آخر ياحلو..!!
@ شنهوه يافلتة زمانك.. هالخطة مثل خطة الرفاع، يعني ممكن يسويها الفارس ويفوز (اثنين) مثل خطتك يابو العريف الماضية.
الله يرضى عليك خليتني اصدق روحي، خليني اعتدل واحط رجل على رجل، وبعدين اقولك شنيه الخطة.
@ ابو العريف عطني اياها، وخلصني؟
شوف، ممكن هالمرة الفرق واحد مش اثنين، ولكن الفوز جاي، جاي، بس المطلوب يسري يسجل، وبشير يسجل.. وماكو تضييع.