تخاريف أبو العريف..!!

@ ابو العريف يرضيك يهديك الله يخليك تطلع لنا في الاسبوع طلة واحدة بس؟
ايش هالكلام اللي مش مركب مصري على لبناني, اش دعوي تراك معروف كل اسبوع التقي معاك في سوق الحراج, نصيحتي لك لسانك ما يركب عليه مصري ولبناني.
@ اف ابو العريف اشوفك داخل عرض هالاسبوع.. الركادة زينة؟
الدنيا حلوة بدون ركادة, واحلى واحلى لما يكون العقل بعيد عن التفكير, او التفكير يكون بعيد عن العقل, او الاثنين معا, لان اللي يفكر هالايام يصير مجنون.
@ على هونك يا دكتور ابو العريف فلسفي للغاية, حدك رياضة وتخب عليك, ايش اللي خلاك تعرج على الفلسفة.
المصيبة اني مضيع وقتي مع بعض الناس, حدهم المستطيل الاخضر؟
@ الله واكبر يامستر بليكس اللي عارف حتى في الطاقة النووية؟
مساكين هالعلماء يذبحون روحهم في الكتب والكمبيوتر, والنهاية شهرتهم ما تتعدى لاعب بولينج مثل السيد/بليكس والسيد البرادعي.
@ يا رجال مصائب قوم عند قوم فوائد.. ولولا المصيبة الكبيرة ما سمعت للسيدين بليكس والبرادعي اي خبر.
والله الرجال بدأ يتكلم في السياسة, ويفهم وانا مفكر كل الرياضيين (اخرطي).
@ مشكلتك يا بو العريف, ومشكلة الجميع انهم مفكرين ان الرياضيين محدودي الثقافة, واللي حاصل هو العكس.
لا الظاهر اني رحت فيها, وطلعت مهزوم هالاسبوع, وانا اللي مفكر حالي ما اهزم مثل ريال مدريد, لكن الحق يقال طلعت (اخرطي) مثل مدرب الاتفاق زوماريو.
@ على فكرة يابو العريف تعرف ان الدنيا حظوظ, تذكر هذا اللي اسمه زوماريو ترى في اليوم من الايام كان مدرب للمنتخب السعودي.
انا اللي اعرفه ان اغنية (الدنيا حظوظ) لراشد الماجد وليست لزوماريو.
@ ابو العريف خلنا نبعد عن الرياضة هالاسبوع, وقولي ايش معنى (فنتازيا)؟
عجبي الظاهر يا بو العريف, صرت مثل نجيب محفوظ, ما دام ان البعض بدأ يسألك عن (الفنتازيا).
@ اف يعني كبير عليك هالسؤال يابو العريف؟
مو كبير لكن بصراحة خلني اقولك, فقد اختلف العلماء في تعريف (الفنتازيا) بعضهم اشار إلى ان ما حدث للاتفاق هذا الموسم هو نوع من الفنتازيا, من بطل لاول مسابقة لصراع من اجل البقاء في بطولة اخرى, والبعض الاخر يشبه صراع الكبار مع القادسية على المربع الذهبي بالفتنازيا.