تخاريف أبو العريف..!!

@ يعني نقدر نقول انك مستأنس على الآخر هالاسبوع؟
* ليه ايش صار في الدنيا.
@ علينا يا ابو العريف نقطة من فم الاسد نعمة, فريقك المفضل لك عليه, لكن في المباراة الاخيرة ما شاء الله عليه.
* يعني انت مصدق اني اتفاقي.
@ اف.. والله تصريح قوي ابو العريف.. ايش يعني ممكن تكون هلالي ولا نهضاوي ولا اتحادي او اهلاوي؟
* انا اللي عذبني زماني وفي الاولى من 30 سنة مكاني.
@ اكيد تشجع التعاون او الجبلين او الوحدة او الانصار او احد؟
* كل هالفرق اللي قلتها شافوا الممتاز والاضواء الا فريقي يسمونه شيخ اندية الاولى.
@ حيرتنا يا ابو العريف.. خلاص عرفته فريق سدوس.
* حتى سدوس زار الاضواء, الظاهر ان ثقافتك الرياضية مثل ثقافة نوال الزغبي في الرياضيات ومثل علاقة ابو العريف باللغة الانجليزية والكمبيوتر.
@ وبعدين وياك يا ابو العريف تراك زودتها شوي قول وخلصنا.
الاصفر والاخضر معذبني.
@ تونا عرفناك شلاخ يا ابو العريف الاسبوع الماضي تقول الاتفاق وهالاسبوع تقول الخليج ويمكن الاسبوع القادم تقول النهضة.
* تقصد من؟ نهضة الخبر او نهضة الدمام.؟
@ شوفوا ابو العريف قام يغط خيط وخيط من وين جبت نهضة الخبر.
* توك صغير يالحبيب كان فيه نادي في الخبر اسمه النهضة وروح لجدك يعلمك به.
@ يعني انت لحقت عليه.؟
* والله سؤال محرج ان قلت اعرفه بيقولون المعجبات وي ابو العريف شايب, وان قلت لا بيقولون ما يفهم في الرياضة.. والحل يا ابو العريف كيف تطلع من هالمأزق, لكن ما اقول الا الله يسامح البكر اللي جاب لي اسطورة زمانه وقال سو معاه حوار.
@ ومنهو ذا الاسطورة؟
* يوم الاحد لا يفوتك اول لاعب سعودي يحترف في الخارج.
@ ما علينا خلنا نعود لشيخ اندية الدرجة الاولى, يقولون فاز بالخمسة هالاسبوع.
* مساكين جماهيره احتفلوا بالصعود والدوري لسه بدري, مساكين ما حد يلومهم 30 سنة في الاولى, متعطشين للاضواء.
@ وانت رأيك ممكن يصعدوا هالسنة؟
والله شوفوا اذا الموسيقار ايمن لعب وجاكسون سجل, واللي قاهرهم وذابحهم الموهوب ابو تركي ظل اساسي خذها مني عالممتاز واصلين باذن الله.
@ ومنهو هذا اللي ذابحهم وقاهرهم؟
* واحد مثل مهندس كرة اليد جايب فيهم العيد كلما كتبنا عنه زاد غيظهم وطفرت روحهم.
@ إلا يقولون يا ابوالعريف ان الطويرقي اختلف مع زوماريو في مباراة الهلال؟
* هذي ما اقدر اقولها من شان ابو محمد لا يزعل علي.
@ صدقني يا ابو العريف انك جبان من توصل عند الاتفاق تصير مهذب (اوي) على قولة اخواننا المصريين.
* مش اوي اوي اوي.. لكن الواحد يرأف على حالهم.