كبابة وهرم ونحلة

بالبلدي الفصيح

اليوم 29 رمضان والله عالم باقي بكرة والا حنعيد.. كنت ماشي كعابي ورايح على سوق باب مكة المهم وأنا ماشي في أمان الله إلا وأسمع صوت قنبلة شعترتني شعترة ومن فجعتي طاحت العمامة من على راسي والمنظرة طارت كمان وشوية أسمع صوت ضحك وكركرة وتعليقات من بعض الأطفال والشباب، وسمعتهم يقولوا: تخاف من طرطيعة ياجبان ؟، طرطيعة تسوي فيك كدا ؟، خصرتهم ولا رديت عليهم وجيت ماشي، وأنا بأتلفت يمين وشمال في الدكاكين إلا وأشوف واحد شاب يقرب جنبي ويقول لي: موية صحة طراطيع.. موية صحة طراطيع.. قلت في نفسي إيش دخل الموية في الطراطيع رجع لي تاني وقال لي: موية صحة طراطيع.. موية صحة طراطيع.. سحبتوو من يدوو وقلت له: أديني قارورة موية صحة.. قال لي: ما تبغى طراطيع عشان بناتك وأولادك يفرحوا بالعيد؟، قلت له: ومالوو نشتري طراطيع أنبسط الراجل وفرح وقال لي هيا أمشي ورايا.. قلت في نفسي عشان كدا بيحرج على الموية أترنوه وراها طراطيع.. ومشيت وراه ومن زقاق لزقاق ومن حارة لحارة الين وصلنا سوق الحمام اللي تنباع فيه الطراطيع واللي فيه بشكة الهوامير اللي يبيعوا الطراطيع إلا وأشوف لك عالم ياكترها تبيع وتشتري من المصايب دي واللي أصحابها مخبينها في دخاشيش ما يعلم بيها إلا الله.. وزبائن أطفال ورجال وحراج ماله أول ولا آخر وشي مو معقول وكل الشغل بين الهوامير سكتيمي.. قال لي: بكم تبغى تشتري ب 1000 ؟، والا ب 2000 ؟، وايش الأنواع اللي تبغاها.. كمان فيها أنواع؟، إيوه، فيه الكبابة والهرم والنحلة والكمترى والقرد والعصفور والفراشة والنافورة والصرصار وعزوز والطلقات والثومة والفحمات ونجوم الليل وأنواع كتير غيرها.. قلت له: أعطيني بس ب 10 ريال نجوم الليل.. فرصع عيونه الواد فيا ووجهه صار أحمر وقال لي: دحين كل هدا الهيلمان ومن زقاق لزقاق وتجي تقول لي: نجوم الليل. هيا أقلب وجهك سوقك مو عندي شوف لك واحد غيري يبيع لك.. أخدت بعضي وجيت راجع من محل ماجيت، وأنا ماشي في الطريق قعدت أضرب بكفي أخماس في أسداس وأسأل نفسي أسئلة كتيرة، وأقول: فين الرقابة وفين الجهات المختصة عن هادي المصايب اللي بتجي للبلد ؟، ومين اللي بيسمح لها تدخل ؟!، ومين المستفيد منها؟!.. ياكم من الأطفال اللي انحرقت أجسامهم من الطراطيع، وياكم من الأصابع اللي تقطعت بسبب الطراطيع، وياكم من العيون اللي انفقعت وانعمت من الطراطيع.. عشان كدا بأقول: يا ابهات ويا امهات خلوا بالكم من أطفالكم وبلاشي تدلعوهم وتشترولهم طراطيع وانتو عارفين انه هادي الطراطيع ما يجي من وراها إلا المصايب، وأنا هرجتكم وفهمتكم، وانتو أدرى وابخص، وإني امرؤ صائم.
abofatoo@hotmail.com